United an inhrithla

December 8, Thawhtanni zan khan English Premier League 2025-26 khelh chhunzawm niin inkhel pakhat a awm. An khelh hnuhnung bera chak zo lo Manchester United chu table mawngphaha awm Wolves lakah an inhrithla a, 4-1 in hnehna an chang. Mikhual an nihna hmunah 4-1-a an chak hi season kal meka an chak chian ber tum a ni. An muala tlawm Wolves hian a chhe lamah EPL record an nihrual.
Table-ah hmasawn ngei tuma tan khawh Manchester United chu table hnuai bera awm nghet tak Wolves hmachhawn turin Molineux Stadium -ah an lenglut. Mikhual an nihna hmunah goal thun hmasa bawk mah se chawlhlawk hmain goal an chhuah a, chungnung bik awm lovin chawlhlawk an hmang. Goal an chhuah vangin United hian chak zawh loh mai an hlau hman viau naa chawlhlawk hnu lamah goal thum ngawt an thun a, awlsam pangngai takin point thum an hmu zui ta a ni.
Chak tum taka tan khawh United hian na takin an khingpuite an nawr nghal a, goal pawh an thun teuh nghal hle. An hun tha nei an hlah hnuin Wolves defender te tihsual vangin hun tha dang an nei zui leh. A hun tha neih a khawhral teuh viau hnuin captain Bruno Fernandes chuan minute 28-naah harsa takin a pet goal hram a, hmahruaina goal a thun.
Goal an thun vangin United an phur a, goal an thun belh teuh thei hle. Bryant Mbeumo chuan uiawm takin a hun tha neih a hlah a, Cunha shot tha tak pawh goal line atangin an dang leh hlauh bawk. United in na takin nawr mah se goal chhuah belh lovin an him hram zel a. An lamah goal thun teuh viau mah se goal pawnah chiah chiah chhuakin an him leh hram bawk. An him hram hram hnuin vannei zawkah an tanga, goal thunin an si phurh an sut ta zawk. Wolves tan hian Jean-Ricner Bellegarde chuan minute 45’+2-ah hnaite atangin a pet goal a, an si phurh a sut. An si phurh an sut vangin Wolves hi an phur ngang mai a, minute 540 zet hnuah EPL-a goal an thun leh hian phurna namen lo tak a pe. Bellegarde goal thun hnuin goal dang a luh belh thei lova, 1-1 a inhnehtawk chungin chawlhlawk an hman a ngai.
Chawlhlawk hmain chungnung thei bik lo mah se Chawlhlawk hnu lamah United an khel tha chhunzawm a, goal an thun leh thuai.Second half tir lamah fuh takin an khingpuite an nawr tlang. Si nghak Johnstone lo tlanchhuak pet kan chiah chiahin Diogo Dalot chuan Bryan Mbeumo tan a chhawpsak. Mbeumo hian minute 51-naah goal ruakah awlsam zetin a pet goal a, hma an hruai nawn leh.
Hma an hruaina nawn leh hnuin United in inrintawkna sang zawk an nei a, an chesual duh tawh lo. United tan hian Bruno Fernandes ball pek fing leh fuh tak mai dawngtu Mason Mount chuan minute 62-naah awlsam zetin a pet goal a, an goal thumna thunin an hmahruaina a tizau leh zual. 3-1 a hma an hruai hnuin hun tawp dawn hnaihah United an che fuh nawn leh a, penalty an hmu. Handball vanga penalty an hmuh hi Bruno Fernandes chuan minute 82-naah harsatna tawk lovin a pet goal a, an goal lina thunin an chakna a nem nghet. Fernades goal thun hnu hian goal dang a luh belh tawh lova, United chuan Wolves lakah hnehna changin point thum an hmu.
Wolves laka point thum an hmuh leh nen United hian khelh 15 atangin point 25 an hmu tling chiah a, paruknaah an inhlangkai. United in table-ah hma an sawn laiin Wolves erawh an talbuai thui tulh tulh thung a, khelh 15 atanga point hnih chauh hmuin table mawngphah an luah nghet deuh deuh zel.
United lakah an tlawm leh tak vangin Wolves hi vawi riat ngawt an tlawm zawn taa EPL-a tlawm zawn rei record an nihrual. Inrinni zan hian table chung bera awm Arsenal an hmachhawn zui leh dawn a, EPL-a tlawm zawn rei ber record thar siam thei dinhmunah an ding. Wolves hian ni 227 chhungin manager pathum an nei hman a. Hemi chhung vek hian sporting directors pahnih an neih hman bawk a, insiamthat tum viau mah se hma erawh an sawn lo viau thung a. Ni 227 chhung hian goal 41 zet an chhuah tlat thung a, an dinhmun a chhe tak zet a ni.