United an phur rei lo, an mualpho

Pathianni zana khan English Premier League khelh chhunzawm a ni a. Manchester United chu an mikhual Brighton & Hove Albion lakah tlawmin an mualpho. United an mualpho lai hian Manchester City erawh chu Ipswich Town lakah an inhrithla a, si ruk fai ngawtin an chak ve thung.
United an phur rei lo
Manager thar Ruben Amorim hnuaiah hmasawn tuma Manchester United hian tunhnaiah result tha an nei. EPL-ah hmahruai mektu Liverpool nen Anfield-ah an inhnehtawk. Liverpool nen an inhnehtawk hnu lawkah Arsenal chu FA Cup atangin an hnawtchhuak zui leh bawk. Team lian lakah beisei aia an khelh that vangin an phur thar a, Southampton lakah an chak zui leh vangin inrintawkna sang tak an nei thar bawk. Team phur thar United hian Pathianni zan khan Brighton chu Old Trafford-ah an mikhual a, an mualah ngei 3-1 in an tlawm a, an mualpho. An mualah ngei an mualpho leh tak vangin United an phur rei lo hle.
Old Trafford a lenglut Brighton hian bul an tan tha viau a, goal pawh an thun hma hle. Inkhel tan atanga minute ngana lekah fuh takin mualneitu an nawr tlang nghal a, Kaoru Mitoma siamsak tha tak chu Yankuba Minteh chuan harsatna tawk lovin a pet goal a, hmahruaina goal a thun. Hma takah goal an thun vangin EPL manager naupang ber Fabian Hurzeler enkawl Brighton an phur a, inrintawkna sang zawk nen an inlan zui theih phah.
An mualah goal chhuah hma viau mah se United an buai lova, huaisen takin an mikhualte an nawr let. Goal thun hmasa zawk Brighton in tul lo takin penalty an chawi a, United forward Joshua Zirkzee chuan penalty a hlawhchhuak. He penalty hi captain Bruno Fernandes chuan minute 23-naah awlsam takin a pet goal a, an si phurh a sut.
United in an si phurh an sut hnuin inkhel a hmuhnawm leh zual a, goal thun tumin an innawr tawn nasa hle. Goal thun tuma an innawr tawn nasa viau chungin goal a luh belh thei lawk lova, 1-1 a inhnehtawk chungin chawlhlawk an hmang.
Chawlhlawk hnu lamah Brighton an khel tha chhunzawm a, goal hnih an thun belh leh. Box chhunga buai nuaih nuaih karah Kaoru Mitoma chuan fuh zetin ball a la tlang a, minute 62-naah United si nghak Andre Onana kap karah a pet goal a, hma an hruai nawn lehna goal a thun.
An mualah hnufual zawka an tan thar leh hnuin United in goal thun ngei tumin tan an khawh zui naa an hlawhtling zo tawh lo. United hian an si phurh an sut thei lo a ni mai lova, goal an chhuah belh leh ta zawk. 2-1 a hmahruaitu Brighton hian fuh zetin an nawr tlang leh a, si nghak Onana chet fuh loh zar zovin Georginio Rutter chuan minute 76-naah awlsam takin a pet goal a, an hmahruaina a tizau. Brighton chuan si hniha hma an hruaina hi team lian United lakah an humhim a, Old Trafford-ah ngei hnehna changin point thum hlu tak an hmu.
An mualah an tlawm leh tak vangin United hian hma an sawn tak tak thei lova, 13-naah an awm chhunzawm. Red Devils hian khelh 22 atangin point 26 chauh an la hmu a, table laihawi hnuai lama an chhuahsan tak tak thei lo. United in hma an sawn theih loh lai hian Brighton erawh chuan hma an sawn hret thung. Brighton hian khelh 22 atangin point 34 an hmu a, pakuannaah an awm mek. European competition khelh phak ngei tumin tan an khawh a, an hneh tak United nen hian an inkarah 8 a tla zep mek a ni.
Manchester United manager Ruben Amorim chuan a enkawl mek Manchester United chu United team awm tawh zawng zawnga team chhe ber an nih thu a sawi a. An tha tawk lo a nih tih an pawm mai a ngaih thu a sawi tel bawk. EPL season kal mekah vawi 22 an khel tawh atangin United hi vawi 10 zet an tlawm der tawh a. Hei hi EPL match 22 atanga an tlawm tam ber tum a ni hial a ni.
City an inhrithla
Beisei anga result nei tha hleithei thin lo Manchester United chu Ipswich Town lakah an inhrithla a, si ruk fai ngawtin hnehna an chang.
Portman Road a lenglut City hi an khel tha viau a, chawhlawk hma leh chawlhlawk hnu lamah goal thum ve ve an thun. City tan hian Phil Foden chuan minute 27-naah hmahruaina goal a thun a. Minute 30-naa Mateo Kovacic goal thun hnuin Foden hian minute 42-naah an goal thumna a thun zui leh a, si thum faia hmahruai chungin chawlhlawk an hmang.
Chawlhlawk hnu lamah City an khel tha chhunzawm a, goal an thun belh leh thuai. Second half tan atanga minute lina lekah Jeremy Doku chuan an goal lina thunin an hmahruaina a tizau a. Minute 57-naa Erling Haaland goal a luh hnuin minute 69-naah James McAtee chuan an goal rukna thunin a tawp a khar a, awlsam takin point thum an hmu zui ta a ni.
Beisei anga an khelh that loh vangin hniam hman mah se City an insiamtha hret hret a, Pathianni chakna point thum an hmuh hmangin top 4 huang an luah let leh tawh. Champion lai City hian khelh 22 atangin point 38 an hmu a. Champion nawn leh turin beiseina thar nei bawk mah se hmahruaitu Liverpool nen an inkarah point 12 zet a tla zep mek a. City hian vawi khatin an khel tam zawk mek bawk. City in top 4 huang an luah let laiin kai thar Ipswich Town erawh chu tlahniam thei dinhmunah an ding ve mek thung.
Forrest a kang ve lo, an tlo
Pathianni zana inkhel dangah Pathumnaa awm mek Nottingham Forrest chuan an mikhual Southampton chu 3-2 in an lo hneh a, pathumna an luah nghet leh zual. USA lamah Forrest kang duai duai mah se ELP-ah Forrest erawh an ding nghet tlat thung a, pahnihna Arsenal nen an point hmuh zat inangin an che tha chhunzawm zel.
Nottingham Forrest hi Table mawngphaha awm Southampton lakah an khel tha viau a, chawlhlawk hmain goal thum an thun hmang. Forrest tan hian Elliot Anderson chuan minute 11-na lekah hmahruaina goal a thun a. Chawlhlawk hmain Callum Hudson-Odoi leh Chris Wood ten goal an thun belh leh bawk. Chawlhlawk a nih meuh chuan chak tur zawk a chiang deuh der tawh.
Si thum ngawt phur tawh mah se him tuma tan khawh Southampton in chawlhlawk hnu lamah na takin an khingpuite an nawr let a, goal hnih thunin tlawm an pumpelh teuh hle. Saints tan hian Jan Bednarek leh Paul Onuchu ten goal thun bawk mah se an si phurh an sut zo thei lova, table mawngphah luah nghet turin an tlawm zui ta a ni.
Pathianni zana inkhel dangah team lian Tottenham chu an khingpui Everton lakah an tlawm a, 15-na daihah an awm chhunzawm ve bawk a, an mualpho nawn leh.