United in last 16 an lut

February 23, Ningani zan khan UEFA Europa League last 16 play-off khelh zawh a ni a. Manchester United chuan Old Trafford-a an mikhual FC Barcelona hnehin an hnawtchhuak. Inkhel dangah Angel di Maria hattrick chhawr tangkaiin Juventus pawhin Nantes an hnawtchhuak ve bawk.
United in Barca an lehthal
Manchester United leh Barcelona te hi Nou Camp an inkhelh tumin 2-2 in an lo inhnehtawk tawh a, an intawn hmasak tumah tlawm an pumpelh vangin United hi Old Trafford-ah chak thei tura ngaih an ni. Inkhel hmuhnawm takah United hian harsa takin hnehna an chang a, an mikhualte an lehthal.
La Liga hmahruaitu Barcelona hian Old Trafford ah bul an tan chhe lo viau a, goal thun hmasa zawkah an tang nghe nghe. Minute 15-naah United captain Bruno Fernandes chuan box chhungah Balde a pawt thlu a, Barcelona in penalty an hlawhchhuak. He penalty hi Robert Lewandowski chuan a pet goal a, hma hruaina goal a thun. Old Trafford-ah goal thun hmasa zawk an nih vangin Xavi team te an phur a, last 16 lut turin beiseina sang tak an nei hman.
Barca in goal an thun hnu hian team hnihte an innawr tawk viau a, hun tha nei ve ve mahse chawlhlawk hmain goal dang lut a awm thei lova, 1-0 a hmahruai chungin Barcelona in chawlhlawk an hmang phawt.
Mualneitu Manchester United in chawlhlawk an hmang tangkai a, second half-ah team thar hlak ang maiin an inlan. Second half a bul tan tha tak United hian an si phurh sutna goal an thun thuai. Second half tan atanga minute hnihna lekah Erik ten Hag-a team te hian box ding lam sirah fuh zetin ball an inpe kual a. Brazilian midfielder Fred chuan tha taka a tawp kharin an si phurh sutna goal a thun.
Goal khat ve ve an thun hnuin inkhel a hmuhnawm leh zual a, goal thun tumin an innawr na dun hle. Minute 73-naah Antony chuan United hmahruai letna goal a thun a. He goal hi hun tawp thlenga venghim in, an mualah hnehna pawimawh tak an chang a. Si belhkhawmah 4-3 a hnehna changin last 16 an lut zui ta a ni.
Ninga zana inkhel dangah Mimuala inlan Juventus chuan Angel di Maria goal thun hmangin Nantes an hneh a, last 16 an lut ve bawk. Angel di Maria hian minute 5-na lekah hmahruaina goal a thun. Hma takah goal an chhuah hnuin Nantes player Nicolas Pallois chu minute 17-naa hnawhchhuah a ni a. Minute 20-naah Di Maria chuan penalty pet goal-in an goal hnihna a thun. World Cup-a Argentina champion puitu Angel di Maria hian minute 76-naah an goal thumna thunin hattrick a siam a, a team a chakpui zui ta a ni. Juventus leh Nantes hi first leg-ah 1-1 in an lo inhnehtawk tawh a, an mualah an hneh zawh loh hi Mimualah 3-0 ngawtin an hneh ta thung. Inkhel dangah PSV chuan Sevilla an hnawtchhuak ve bawk.