United in player 11 chhuahtir an tum

Premier League club lian Manchester United chu season tharah tha zawka inlan thei turin an squad thuam chak thar an tum viau a. Bazarna tum sum tuak nan manager Erik ten Hag chuan an player 11 zet chhuahtir in, £100m tuak nghah a tum dawn.
Manchester United hian Manchester khuaa an elpui lian Manchester City el phak tumin tan an khawh dawn a, EPL leh champions league-ah champion beisei ngam turin player thar lak nual an tum. Player thar tan hmun kian turin an player neihsa chhuahtir nual an tum a, chung zinga langsar zingah chuan an captain Harry Maguire a tel. Chetsual khut hrat ve tak Maguire hian season liam ta pawh khan hmun pawimawh a chang phak tawh lova, season tharah khel tam thei turin club thar a zawn ngei a ngaih hmel.
Manchester Evening News in an tarlan dangin United hian an defender Maguire bakah hian Alex Telles leh Eric Bailly te pawh hralh an tum. Anni pahnih hi season kal ta khan loan in an khel-chhuak ve ve a, an khelhchhuahna Sevilla leh Marseille ten lak an hreh lo. Anni bakah hian left-back Brandon Williams pawh hralh an tum zingah a tel a. Rawlthar duhawm Tyrell Malacia a awm tawh vangin Brandon Williams hi hralh an hreh lo. An defender te chhuahtir nual an tum bakah hian season tawp rual khan Axel Tuanzebe leh Phil Jones te chuan Old Trafford an lo chhuahsan fel tawh nghe nghe.
United hian an hnen atanga inzirchhuak Anthony Elanga chu £10million in an hralh phal. Rawlthar Anthony Elanga hian ngaihven hlawh hluai mah se manager Erik ten Hag-a ruahmannaah hmun a chang tawh lo niin tarlana ni. Elanga bakah hian an hnen atanga inzirchhuak ve bawk Hannibal Mejbri pawh £10m velin hralh an phal ve bawk. Ani hian season liam ta khan loan in Birmingham a zawm a, a che chhe lem lo viau.
United player hlawh hnem ber ni mek leh an si nghak rinrawl David de Gea pawhin Old Trafford a chhuahsan a rinawm deuh deuh zel. De Gea hi Red Devils hian contract thar chu an zawrh ngei a, a hlawh tihtlem a ngaih bakah rinrawl a ni chhunzawm ang tih a chiang lo tel bawk. Heti a nih vang hian club dang panin a chhuah a rinawm sawt hle. De Gea bakah hian midfielder Donny van de Beek, Fred leh forwar Anthony Martial te pawh Old Trafford chhuahsan tur langsar zingah sawi tel an ni.
Brazil midfielder Fred hian United tan vawi 213 zet khelin, goal 14 a thun tawh naa Ten Hag ruahmannaah hmun pawimawh a chang phak tawh lo. United chuan Fred hi £20million vel bawrin an hralh phal a, Fulham in an ngaihven viau niin tarlan a ni.
United hian player thar lak an tum zingah si nghak thar lak ngei an tum a, sriker rintlak tak pahnih, midfielder tha tawk tak leh defender thar lak tumin an mit an len kual mek.