United leh City an tlang, Chelsea an tla

London club lian Arsenal tel ve tawh lohna FA Cup fourth round chu zirtawp zan leh Inrinni zan khan khelh chhunzawm a ni a. Champion lai Manchester United leh champion tura rinkai Manchester City ten hnehna an chan laiin Chelsea chu Brighton & Hove Albion lakah an tlawm a, FA Cup atangin an puanthuah an tel ve thung.
United chakpuitu Maguire
Harsa taka Arsenal an paltlang hnuin Manchester United in champion zia an pu chhunzawm zel. United hian Old Trafford-a an mikhual Leicester City lakah si phurh hmasak zet hnuin hun pek belha Harry Maguire goal thun hmangin hnehna an chang a. Champion nawn leh thei turin hma lam an pan zel.
English Premier League-ah 13-naa awm mek United hian EPL-ah 18-naa awm mek Leicester Ciry lakah bul an tan tha lova, an manager lailawk lo ni zuai tawh leh an forward hlui Ruud van Nistelrooy enkawl Leicester City lakah goal an chhuah hmasa. Old Trafford-a lenglut Leicester tan hian Bobby De Cordova-Reid chuan minute 42-naah hmahruaina goal a thun a. He goal hmang hian si khat faia hmahruai chungin chawlhlawk an hmang.
Chawlhlawk hmain goal thun thei lo United hian Chawlhlawk hnu lamah pawh beisei angin goal an thun hma thei lo. Goal thun tuma an khingpuite an nawr reng vangin an hun a thleng a, Red Devils in goal an thun a nge nge a, Joshua Zirkzee chuan minute 68-naah goal thunin an si phurh a sut.
Goal khat ve ve an thun hnuin inkhel a hmuhnawm zui viau a, team hnihte hian hun pangngaiah goal an thun belh thei tawh lo ve ve. Hun pangngai zawh hnu minute 90+3-ah defender Harry Maguire chuan tauh goal in United hmahruai letna goal a thun. Offside position atanga Marguite goal thun hi United in an chakpui a, fifth round an inhlangkai.
Leicester City laka Harry Maguire-a’n United chakna goal a thun dan hian sawi zui a hlawh hle. Offside ngei nia a lan laiin offside a lak a ni lo tlat thung. FA Cup-ah hian fourth round thlengin Video Assistant Referee (VAR) hman a ni lo va, fifth round atangin VAR hi hman a ni dawn thung. Fourth round-ah VAR hman ni ta se United leh Leicester City te inkhel result hi a danglam daih mai thei.
Hun pek belhah Harry Maguire goal thun hi Sir Alex Ferguson hun laia hun tawp dawna an chak theih riau ang khan sawi zui a ni a. Hemi chungchang hi Foxes manager Ruud van Nistelrooy chuan, “United chak dan kha Fergie time ni lovin, offside time a ni zawk”, tiin a sawi zui ve thung.
City in Leyton an lehthal
Zirtawp zanah champion lai Manchester United an chak laiin Inrinni zan khan Manchester khaw club pakhat zawk Manchester City in mikhual an nihna hmun Gaughan Group Stadium-h mualneitu Leyton Orient an lehthal a, fifth round an inhlangkai ve bawk.
Gaughan Group Stadium-a lenglut City hian bul an tan tha lo viau a, inkhel tan atanga minute 16-na lekah City si nghak Stefan Ortega chuan an lamah a ti-goal palh a, Leyton hmahruaina goal a thunsak. An mikhual team lian lakah goal an thun hmasask vangin League One-ah pakuana ni mek Leyton Orient an phur viau a, inlehthalna lian thlentir an tumruh viau bawk.
Hnufual zawk ni chungin chawlhlawk hmang mah se chawlhlawk hnu lamah City an insiamtha a, goal an thun thuai. City tan hian an player thar Abdukodir Khusanov chu minute 56-naah goal thunin an si phurh a sut. City si phurh sutna goal thuntu Abdukodir Khusanov hian EPL-ah City tan bul a tan tumin a che chhe viau a, sawisel pawh a hlawh zui nasa hle. FA Cup-ah erawh City tan goal thunin a chetha ta viau thung. Khusanov hian hma a sawn chak viau a, EPL-ah a hming a chher lian thuaiin a rinawm.
An si phurh an sut hnuin City an khel tha chhunzawm a, an midfielder pawimawh Kevin de Bruyne chuan minute 79-naah an hma an hruai letna goal a thun a. Kevin De Bruynehi Leyton Orient lakah chakpuiin Manchester City chuan fifth round an inhlangkai zui ta a ni.
Chelsea an tla : Inrinni zana inkhel dangah team lian zinga mi Chelsea chu Brighton lakah 2-1 in an tlawm a, fourth round paltlang zo lovin an tla.
American Express Stadium-a lenglut Chelsea hian bul an tan tha viau a, goal pawh an thun hma hle. Inkhel tan atanga minute ngana lekah Broghton player Bart Verbruggen chuan an lamah a ti-goal a, Chelsea hmahruaina goal a thunsak.
Hma takah goal an thun vangin Blues an phur viau a, an phur rei lo thung. Mualneitu Brighton tan hian Georginio Rutter chuan minute 12-na lekah goal thunin an si phurh a sut. Hma takah goal hnih lut mah se goal a luh belh lawk thei lova. Chelsea lakah Brighton chakna goal hi minute 52-naa Kaoru Mitoma thun a ni.