United veltu David De Gea

Pathianni zana English Premier league khelhah pathumnaah kaisang tur a chak mamawh Manchester United chu West Ham United hneh lovin an tlawm ringawt. United tlawm chhan hi si nghak David de Gea chesual vang a ni a. United veltu chu an si nghak David De Gea ngei hi a ni.
Palinaah awm mek Manchester United hi an elpui lian Newcastle United an chak loh vangin phur takin London Stadium-ah an leng lut a. 15-naa awm mek West Ham lakah chak turin inrintawkna sang tak an nei nghe nghe. Inrintawkna leh beiseina sang tak nen Mimualah bul tan bawk mah se David de Gea chet hoh vangin hnual takin London an chhuahsan leh ta zawk.
Erik ten Hag-a team United hian goal thun thuai tumin an khingpuite an nawr a, an nawr luat tuar lovin goal an chhuah thuai thung. Minute 27-naah fuh zetin Hammers hian an khingpuite hi an nawr let a. Saïd Benrahma chuan tha tak tia sawi tur ni lem lovin goal zawnah a pet a. Benrahma pet hi si nghak tan dan harsa tura ngaih ni lem lo mah se ho takin David de Gea chuan a lo chhuah tlat thung. Rin loh taka hmahruaina goal an thun vangin David Moyes a team West Ham an phur viau a, hnehna chhinchhiahtlak an chang zui ta nghe nghe. David de Gea hian season kal mekah tihsual ho tak tak vawi li ngawt a nei ta a. Tihsual tam lamah Hugo Lloris nen an intluk mek a ni.
Ho taka David de Gea goal chhuah vangin United hian London Stadium-ah point an hlawhchhuak zo lova, palinaah an awm chhunzawm a ngaih phah. Hammers lakah hian chak nise Newcastle United lehpelin pathumnaa kaisang tur an ni a. An tlawm leh tak si vangin khelh hmabak pali chiah nei tawh chungin palinaah an awm a. Point hnihin an chunga awm Magpies hi an phak lo zui zel.
Pathianni zanah Newcastle United leh Manchester United te an tlawm vangin top 4 huang luah phak tuma inelna boruak a nung thar leh zual. Panganaa awm mek Liverpool chu United ai hian point khat chauhinan hniam zawk mek a. Khel tam zawk ni mah se Liverpool hian an hmel ma lian Manchester United lehpelh theih beiseina an la nei sang hle.