76ers in Celtics an nihrual

Thawhtan zing khan NBA Conference play-off khelh chhunzawm a ni a, inkhel hmuhnawm takah Philadelphia 76ers chuan Boston Celtics an hneh a, Series ah 2-2 a ni ta chiah. Inkhel dangah Phoenix Suns in Denver Nuggets an hneh ve bawk.
Series ah 2-1 a hnufual mek Philadelphi 76ers hian an khingpuite nihrual a, an kal fal tur chelh nan chak an mamawh a. Inkhel hmuhnawm takah hun pangngaiah chak zo bik lo mah se, overtime-ah an chak hlauh a, an khingpuite an nihrual thei hram.
Semi-final game linaah hian chak mamawh 76ers in bul an tan tha a, quarter hmasa pahnihah chungnung zawk an ni ve ve. Quarter khatnaah point 8 in chungnung zawkah an tang a. Quarter hnihnaah point khatin an chungnung zui leh a. Point 9-a hmahruai chungin chawlhlawk an hmang.
Chawlhlawk hnu lamah inkhel a hmuhnawm leh zual a, an inkhel tawk leh zual hle. Quarter thumnaah point 33 ve ve thawkchhuakin an inhnehtawk phawt a, 76ers tan chakna hun tha lehzual a inhawng. Point kuaa hmahruai chungin quarter hnuhnung ber hmachhawn bawk mah se Celtics er let an dal zo lova, an hmahruaina zawng zawng an hloh fai vek a, point 107 ve ve hmuin an inhnehtawk phawt.
Hun pangngaiah chak zawk an awm theih loh vangin overtime khelh chhunzawm a ni a. Overtime-ah pawh an inhnehtawh zui leh viau a, point khata sang zawk ni hramin Philadelphia 76ers hian hnehna pawimawh tak an chang a, an khingpui Boston Celtics hi point 116-115 in an hne.
Harsa taka Celtics an hneh tum hian 76ers tan James Harden a chetha viau a, point 42 zet a thawkchhuak.
Thawhtan zingah semi-final dangah Phoenix Suns chuan Denver Nuggets chu point 129-124 in an hneh a, an ni pawh hi game li khelh tawhah 2-2 in an inhnehtak ve mek bawk. Nuggers an hneh tum hian Suns tan Devin Booker leh Kevin Durant te an khel tha dun hle. He inkhela point thawkchhuak hnem ber chu MVP hlui Nikola Jokic a ni a, point 52 zet a thawkchhuak