US hnuah UN in BJP sorkar-ah ngenna siam

UN Secretary-General Antonio Guterres thupuangtu chuan India leh ram dang inthlan hmachhawn tur ten mipuite ‘political leh civil rights’ humhimin mi tin ten him leh zalen taka vote an thlak theih nan boruak an siam kan beisei tiin a sawi.
He thu hi Secretary-General thupuangtu Stephane Dujarric chuan Lok Sabh inthlan hmaa India rama ‘politics boruak tang’ tak awm mekah Delhi Chief Minister Arvind Kejriwal man a ni leh opposition Congress party te account khawih chet theih loha dahsaka an awm chungchang zawhna a chhanna a ni a.
“India leh ram dang inthlan hmachhawn turah te mi tin te chanvo, political leh civil rights te humhim a nih a, him leh zalen taka mi tin ten vote an thlak theih kan beisei a ni” tiin Dujarric chuan press briefing a neihnaah a sawi a ni.
United Nations hma lawk hian US pawhin Kejriwal man a nihnaah leh Congress party bank account khawih chet theih loha dah a nihnaah sawi a nei tawh bawk a.
US thusawi chu duh lovin India chuan Kejriwal man a nih chung changa US thusawiah senior US diplomat chu thuzawhfiah turin a ko nghe nghe a. Mahse, Washington chuan dik leh fel tak, langtlanga engkim kalpui a ngiat tlat tiin a sawi.
Delhi-in US diplomat a koh chungchangah US State Department thupuangtu Matthew Miller chuan, “Private a diplomatic thil kan sawi dun chungchang ka sawi dawn lo. Mahse, chiang tqakin mipui nawlpui hriatah dan ang thlap leh langtlang taka thil kalpui ni se kan duh thu ka sawi a ni. Chu chu tute mahin an dodalin ka ring lo va, chu bawk chu private pawhin chiang takin kan sawi ang” tiin a sawi.
Ministry of External Affairs (MEA) officials te chuan Acting Deputy Chief of Mission Gloria Berbena chu Indian capital Delhi a South Block office ah an ko va, minute 30 chuang sawihona an nei tia sawi a ni.
Kar kalta Ningani khan India chuan US State Department-in Delhi Chief Minister Arvind Kejriwal man a nih chungchanga sawi a nei chu ‘tul lo’ tia sawiin pawn lam atanga inrawlh tumna reng reng an duh lo bur tiin a sawi tawh a.
India electoral leh legal processes a pawnlam atanga inrawlh tumna reng reng chu pawm theih loh bur a ni tiin MEA thupuangtu Randhir Jaiswal chuan weekly press briefing a neihnaah a sawi a. India legal processses te chu ‘rule of law behchhan chauh a ni’ tiin a sawi.
Kar kalta Nilaini khan Ministry of External Affairs (MEA) chuan thuchhuah a siamah US State Department thupuangtuin India rama legal proceeding thenkhata sawi a neih chu na takin duh lohna a lantir tiin a lo sawi tawh bawk a ni.