US House speaker-in Tsai hmuh ngei tum

US House Speaker Kevin McCarthy chuan tunkarah Taiwan president Tsai Ing-wen nen inhmuhna an neih tur thu a sawi a. China-in Tsai nena inhmuhna an nei a nih chuan a ‘sawhkhawk na tak’ a thleng ang tia a vau lawkna chu a pawisa lo.
Tsai hian Central America tlawha a zin haw lam US-ah Nilaini hian a lut dawn a, a chawl zuai dawn a ni.
Nikum khan khatih laia US speaker Nancy Pelosi chuan Taiwan a lo tlawh tawh bawk a, China-in duh lo hlein Taiwan a cham lai laiin South China Sea-ah military drill a neih khum zui a ni.
US-China inlaichinna hian a hniam lai ber a thleng mek tia sawi a ni a. Tun hnaiah China spy balloon leh US-in China-in advanced tech a neih theih loh nana a hrekna te chuan ram pahnih inlaichinna a tichhe zual bawk.
McCarthy chuan Taiwanese leader Tsai hi Ronald Reagan Presidential Library, Los Angeles daifemah a hmu dawn tiin a sawi a. Taiwan ram ni lo, US a ram pahnih hruaitute inhmuhna hi China nena inkar chhia tihzual zel loh nana ruahmanna tia sawi a ni bawk.
Mahse kar hmasa khan Beijing chuan Tsai leh US official-a third-highest ranking tena inhmuhna an nei a nih chuan a sawhkhawk na tak a awm ang a lo ti lawk thung a.
Thawhtanni khan Chinese foreign ministry thupuangtu chuan Beijing chuan US leh Taiwan sorkar tena official-a inbiakna an neih tur reng reng chu a duh lo bur tiin a sawi nawn leh bawk a. US hian Beijing nen diplomatic relations neiin mahse Taiwan chu a thian tha leh ralthuam petu ber a ni bawk.
Kum 2016-a Tsai-in thuneihna a chan hnu atangin Beijing chuan nasa zawkin Taiwan a zim a, sipai chakna lam, economic leh diplomatic lam thlengin a nawr chep hle a ni.
Taiwan-in lamtang a neih ngahna ber Latin America-ah pawh China chuan nasa zawka hma lain Taiwan thian ram te a lamah a senghawi zel a, tunah chuan Taiwan chuan diplomatic lama inzawmna a neihpui ram 13 chauh an awm tawh a ni.
China hmalak zelna dan nan Tsai hian Central America ram hi tlawh a ni reng a, Guatemala leh Belize ram hotu lawk te nen inhmu in inzawmna an sawhnghet a. Thla kalta khan Taiwan chuan a thian tha ni reng Honduras chu China lakah a hloh tawh thung.
President Tsai-in Taiwan a chhuahsan hnuah Taiwan defence officials te chuan Chinese aircraft te chuan Taiwan Strait an fang chamchi tia sawiin hei hi China-in Taiwan a vauna a nih thu an sawi bawk.
Beijing chuan Taiwan mipui maktaduai 23 chenna thliarkar hi a ram anga a chhal leh nakina mainland China nena la inzawm leh turah a ngai a, Taiwan erawhin independence ram angin a inngai ve thung.