US-in a ngaihhnathiam hnuah India-in Russian tuialhthei lei tam

US-in a hrekna a ngaihhnathiam hnuah April leh May thlaa Russia-in India hnena tuialhthei a hralh chu a tam ber lai a hnaih thuak a, thlifimtute chuan an mamawh tam zawk chu hrek ve loh company leh lawng hmangin an la lut niin sumdawngte leh Thawhlehnia data atangin a lang.
India hi China dawta Russian tuialhthei thlitfim loh lei tam ber niin a chhuan em em, Urals grade la luttu tam ber a ni a. Hetianga a leisak thar leh teuh avang hian Ukraine indona atana sipaia sum hmang tam tak, Moscow chu nasa taka a puih a rinawm hle.
India hian March thla khan Russia atangin ni khatah tuialhthei barrel maktaduai 2.25 a la lut a, hei hi February thlaa a lak luh zat let dawn niin a lak luh zinga a zahve vel chu Russian tuialhthei a ni.
Indian lawng chawlhhmuna Russian tuialhthei thlitfim loh lut chu April 20 leh 27 inkar khan ni khatah barrel maktaduai 2.1 a tling tep a, a hma chiah chawlhkarin ni tin barrel maktaduai 1.67 dawn a ni bawk tih shipping analytics firm Kler data chuan a tar lang.
April thla laihawl vela Russian tuialhthei lut a tlem chhan hi March thla tawp lama Ukrainian drone-in Russian lawng chawlhhmun a beih avanga thawnchhuah a tihkhaihlak vang a nih a rinawm thu thu dawnna pahnih chuan an sawi.
India-in thla khat chhunga Russian tuialhthei a lak lut hi ni khatah barrel maktaduai hnih chuang a nih rin a ni a, May-ah pawh hetiang vel tho hi a nih rin niin a a pung zawk thei bawk niin sumdawnna hriate chuan an sawi.
Washington chuan March thla laihawl khan ram hrang hrangte chu Iran nena an indo avanga khawvel energy sumdawnna buai phah tihziaawm nan Russian tuialhthei leh petroleum product an lei theih nan ni 30 chhung ngaihhnathiamna a pe a. Kar hmasa khan hei hi kalpui chhunzawm turin a ti bawk.
Lei phalsak loh an nih chhung pawh khan Kyiv nena inremna thuthlung siam tura nawr nan India hian ⁠Russian tuialhthei hi hrek ve loh enterprise kaltlangin a la chhunzawm zel tho niin sumdawng leh mi thiamten an sawi.
Indian thlifimtute chuan nghahhnathiamna puan a nih hma khan Russian tuialhthei hi an lei reng a, kar hmasa atang khan May-a thleng turin tam tham tak leiturin thil an tifel tawh bawk niin sumdawngte chuan an sawi.