US-in ama thua Iran a biak vangin beihah Oman vau

President Donald Trump-a chuan US thawhpui, Oman chu an sorkarin ‘anmahni thu thua’ Iran a lo biak avangin beihah a vau tih Fox News-in a tar lang.
US leh Oman hian a hranin Tehran chu khawvel tuikawng pawimawh, Strait of Hormuz a nih theih nan an dawr ve ve a. US-Iran indo avangin thla ruk dawn khar a ni tawh.
Fox-a thawkin telephone-a US president a kawmnaah Oman vauna a sawi chhuak tih Thawhtanni khan a sawi a ni.
Thawhtanni vek khan Iranian thuneitute chuan Oman nen hian inremna an tifel tep tih an sawi a. Hetih mek lai hian US leh Iran inkara ni 60 awh tur Memorandum of Understanding (MoU) an siam chu a tawp tep.
US leh Israel tang dunin February thlaa Iran an beih hnuah Tehran hian khawvela tuialhthei leh liquefied natural gas phurh hmun ngaa thena hmun khat kalna kawng, Strait of Hormuz hi khar a ni a. Hawn leh tumna hi an indawrna an mutan ber a ni.
Oman chim lam hi Strait nena inri niin indonaah hian tan lam nei lo a ni a. Heti chung hian Iran atangin vawi tam beihna a tawng tawh a, tuikawng hawn a nih theih nan Tehran a dawr zui bawk.
Washington chuan ama puala hawntir tumin a bei mek a. Fox reporter Trey Yingst-a chuan Trump-a hian, “Oman-in hma an lo la a nih chuan kan bomb nasa ang,” a ti niin a sawi.
Fox-in a kawmnaah hian Trump-a hian US chuan Iran-a sipai, eibar leh politic-a huhang na tak, Islamic Revolutionary Guard Corps (IRGC) nen pawh an indawr tih a sawi bawk.
IRGC thupuangtu erawh chuan Trump-a thil sawi hi a dik loh thu a sawi a. Iranian news agency Tasnim News hnenah, “IRGC thuneitute American-te inbiakna a awm lo va, Trump-a’n indonaa hneh a nihna leh a mangang tal velin a mitthla leh a mangchhia dawt a sawi mai a ni,” a ti.
Trump-a’n Oman beiha a vau hma lawk hian Iran chuan an thenawm ram nen hian Strait-a zalen taka lawng a kal theihna tura inremna an nei thei ta tih a puang.
Iranian foreign ministry thupuangtu, Esmaeil Baghaei-a chuan ‘lawng kalna tur bikah inhriat thiam tawnna kan nei thei’ tiin thuthar lakhawmtute a hrilh.
Thuchhuah intawm an siam hmain ram pahnihte hian thil tihfel ngai an la nei tih a sawi a. A hmain Oman pawhin an inbiakna chuan thil tha lam a hawi tih a lo sawi ve tawh bawk.
Tun thla tir khan Iranian Foreign Minister Abbas Araghchi-a chuan a vaia strait hawn chu Tehran-in MoU bawhchhiaa US a puhnaah Iran hnena zangnadawng a pek dan azir a nih tur thu a lo sawi tawh.
Iranian thuneitu pakhat chuan Tehran hian strait kaltlang lawngte hnen atangin an thil phur hlut zawng atanga chhuta 5-7% kal man lak a duh niin Reuters a lo hrilh tawh bawk.