US-in dan lova Indian lutte thawn kir

US-in dan lova Indian
lutte thawn kir
US-a dan lova lut zinga mi, Indian 205 chu US sipai thlawhna hmangin thawn haw an ni a, Texas atanga phurh chhuah an ni.
Indian-te hi tute nge an nih pawh hriat chian vek an ni tawh a, US atanga thawn kir tur hian New Delhi sorkar pawh a buaipuitu zingah a tel a. Tun hi hetianga US-a Indian awm thawn haw hmasak ber a ni.
C-17 US sipai thlawhna hmangin an ram huna Thawhtanni zan, India-a Thawhlehni tuk khan Indian-te hi an ramah phurh haw tura chhuahpui an ni a. Ab thlawhna hman hi bungraw phurh nana hman chi niin inthiarna pawh pakhat chauh a awm a, darkar 24 tal an thlawh a ngai dawn thung.
US President Donald Trump-a chuan an rama dan lova luta awm zui tate zawn chhuaha anmahni rama thawn kir leh hi a aupui nasa hle a. A hma pawhin US sipai thlawhna hmangin Guatemala, Peru leh Honduras mite an lo thawn haw tawh.
Hetianga Indian thawn haw an ni hi Prime Minister Narendra Modi-a’n karlehah US a tlawh dawn nia sawi a awm mek laiin a ni a. A tlawh a nih chuan Trump-a president a nih nawn leh hnua a vawi khatna tur a ni.
A hmain External Affairs Minister Dr S Jaishankar chuan New Delhi chu mi rama dan lova Indian awmte hruai kir turin dan angin hma a la reng tih a sawi a, heng zingah hian US pawh a tel.
“Kan ram chanchina a vawi khat nan dan lova kan rama ram dang mi awmte awmna dap chhuakin kan sipai thlawhnaah kan hlang a, an hmun turah kan thawn kir mek zel a ni,” tiin Trump-a hian thla hmasa khan thuthar lakhawmtute hnenah a sawi.
US president hian Prime Minister Modi-a kaihhruai India pawhin dan lova Indian lutte chungah ‘a tih tur dik tak’ a tih tur thu a lo sawi tawh bawk a. Bloomberg News-in a tar lan dan chuan India leh US hian US-a dan lova pem lut Indian 18,000 vel an hre thei.
Ministry of External Affairs chuan India hi dan lova ram danga pem chu a duh lo va, hetiang mi hi pawla insiama dan bawhchhiatna thlenna nen a inzawm duh thin niin a sawi.
“Indian-te chu United States chauh ni lo, khawvel ram dangah pawh, Indian an niha an awm hun tur aia rei an awm emaw, lehkha pawimawh nei lova an awm a nih chuan kan la kir ang a, lehkhate min hmuhin kan mi ngei a ni tih kan fiah ang a. Chutiang thil a lo awm a nih chuan hma kan la ang a, India-ah kan hruai haw zel ang,” tiin ministry thupuangtu, Randhir Jaiswal chuan thuthar lakhawmtute hnenah a lo sawi tawh.
New Delhi-a US Embassy thupuangtu chuan US hian ‘a ramriah khauh zawkin thil a kalpui a, pemna dan pawh a kengkawng khawng zual a, dan lova pemte dah chhuah vek a tum’ tih a sawi a. “Hei hian thil a tihchian em em chu – dan lova pem chu a manhla lo dawn hle a ni tih hi a ni,” a ti bawk.