US chuan an ram chhungah eng nge a nih chiah hriat loh object thlawk kaphthla lehin tihian pali lai a kahhtlakna a ni tawh.
-- Advertisement --
President Joe Biden chuan Canadian border hnaiha Lake Huron bula balloon ni awm tak thlawk reng chu kap thla turin thu a pe leh a ni.
He object hian commercial air traffic tibuai thei niin 20,000ft vela sanga thlawk mek a ni tiin Pentagon chuan thuchhuah siamin a sawi a. Kar kalta Inrinni khan Montana a military site bulah hmuh hmasak bawk niin enfiah a nih hnuah kahthlak a ni zui ta a ni.
He object hi military tana hlauhawma ngaih a ni lo va, mahse, khalhtu awm lo octagonal shape niin F-16 fighter jet chuan a kap thla zui a ni.
Heng balloon te hmuh a ni fo hian North America a high-altitude chuan ngaihven a hlawh thar a. February ni 4 khan South Carolina coast-ah Chinese balloon nia ngaih chu kahhtlak a lo ni tawh bawk a. China chuan he balloon hi weather en nana a hman tiin a sawi a.
He balloon kahthlak them te hi chhar khawma zawn mek niin eng nge a nih chiah hriatfiah tuma zirchian zui nghal tur a ni a. Mahse, Alaska a khawchin duhawm lo lutuk avangin duh anga chaka chet lak theih loh a ni.
“Tuna balloon kahthlak hi a hmaa South Carolina a kahthlak nen inang lo a ni a, kahhtlak kehthem te kan chharkhawma hriatfiah hma chuan sawi theih kan nei lo,” tiin White House National Security thupuangtu chuan a sawi.
Pathianni khan US Air Force general North American airspace enkawltu ber chuan engtiangin nge heng object te hian boruakah America a luh theih tih leh khawi atanga lokal nge tih an la chian theih loh thu a sawi bawk a.
Tuna kahthlak hnuhnun ber hi chu spy balloon ni lovin weather balloon nia a lan thu senior official chuan ABC news hnenah a hrilh a, mahse, hei hi Congress a top Democrat chuan hnawl thungin object an kahthlak chu surveillance balloon ni ngeia a a lan thu a sawi thung.
“Balloon a nih thu an sawi a, South Carolina coast-a kar kaltaa kahthlak ai kha chuan a te fe zawk. Thla hmasa lawk kha chuan heng balloon te hi a awm tih reng kan hre lo” tiin Senate Majority Leader Chuck Schumer chuan a sawi.
Democrat Debbie Dingell pawhin, “Khawi atanga heng balloon te hi lokal nge an nih, eng nge an tum, eng vangin nge an pun tak viau heng te hi kan hriat a ngai,” tiin a sawi thung.
Democratic Senator Jon Tester pawhin, “Tun hnaiah thil thleng te a danglam hle a ni. Sipaite hian eng nge a nih hriatfiah mai bakah eng nge a hlauhawmna thlengin an hriatfiah a ngai,” tiin a sawi bawk.
Republicans te chuan Biden administration chu che muang lutukah puh nghalin balloon te chu a hma daiha kahthlak vat tawh zawk tur an ti bawk.
Hetih lai hian UK Defence Secretary Ben Wallace chuan US leh Canada-a balloon kaihhnawih thil thleng avangin security review an neih tur thu sawiin, “Heng thil thleng te hian global threat picture a chhe zawngin a tipunlun tih a pholang a ni,” tiin a sawi.
February ni 4 khan US military te chuan surveillance balloon nia ngaih chu South Carolina coast-ah an kapthla a, Febraury ni 10 khan northern Alaska-ah an kap thla leh bawk a. February ni 11 khan American fighter jet te chuan Canada-a Yokon territory-a high-altitude airborne object chu Canadian sorkar phalna la thlapin an kap thla leh bawk a, February ni 12 khan Lake Huron bulah high-altitude object dang chu fighter jet hmang bawkin an kap thla leh a ni.
Heng balloon te inenthlakna nia ngaih ngeite avang hian United States leh China inkar a chhiat phah mek a ni.