US-in ruihhlo phur nia an sawi lawng pali an kahah mi 14 thi

US-in ruihhlo phur nia an sawi lawng pali an kahah mi 14 thi
US sipaite chuan Pacific-ah ruihhlo phur nia an sawi lawng pali kap lehin mi 14 an thi tih Defence Secretary Pete Hegseth-a’n a sawi.
Dam chhuak pakhat chu Mexican mi zawng leh chhanchhuaktuten an chhanchhuak.
Tun hi Pacific leh Caribbean tuipuia ruihhlo phur nia an sawi an beihna thar ber a ni.
Pacific khawchhak lamah President Donald Trump-a thupeka ruihhlo tawlhtute laka beihpui an thlak kal zelah Thawhtanni khan an kap niin Hegseth-a chuan a sawi.
Hetianga an che hi a bul vela awm leh mi thiamte chuan dan angin a tih theih em tih an sawi thin a. US Congress-ah pawh Democrat leh Republican thenkhatin president-in hetiang ti tura thu pe turin thuneihna a nei em tih an sawi thin tawh bawk.
Ruihhlo phur nia an sawi an beihnaah hian mi 57 vel an thi tawh a, he thil vang hian US leh Colombia leh Venezuela sorkarah khi a awm phah bawk.
An kah tam zawk hi Caribbean-a South America vaukamah a ni a, tun hnaiah Pacific Ocean-a mi pawh an kap tho.
Hegseth-a chuan lawng pali an kahte hi hnuchhuituten an finfiah hnuah ruihhlo tawlhna kawng leh ruihhlo phur ngei an ni tih an hria tih X-ah a tar lang.
Hegseth-a hian a hmasa berah ‘narco-terrorists’ pariat an thi a, a dawta vawi hnih kahah pali leh pathum an thi leh niin a sawi bawk.
Mi pakhat a dam chhuak a, Hegseth-a hian Mexican-ten an chhanchhuak tih a sawi a. A dinhmun leh khawiah nge a awm tih erawh hriat a ni rih lo.
Hegseth-a hian video a dahah lawng eng emaw zat kang lai a lang a. “Department hian kan ram hum tumin kum 20 chuang hun an hmang tawh a, tunah chuan kan inveng ta,” a ti.
Lawng an beih zinga pali vel hi ruihhlo tawlhna kawng lun tak, Pacific-ah a ni a, a dangte hi Caribbean-ah a ni.
President Trump-a chuan tu ram huam chhung mah ni lo tuipuia lawng an beih hi a dik tih a sawi a; mahse, kar hmasa khan khawmualah beih zui an tum a nih erawh chuan Congress pawmpuina a dil ve mai thei tih a sawi.
Khawmuala mi bei tur pawhin ‘an inpeih fel tawh’ niin a sawi a, he hian inhniamna tam tak a siam thei dawn nia ngaih a ni.