Modi-Trump inkawm, US tuialhthei tam zawk la lut dawn

Modi-Trump inkawm, US tuialhthei tam zawk la lut dawn
Indian Prime Minister Narendra Modi chuan US hruaitu, Donald Trump-a nen inbiaa an insumdawn tawnna hniam mek titha lehtura Delhi-in US tuialhthei leh boruakalhthei tam zawk a chawk luhna tur an sawi dun hnuah ram pahnih inkara thawhhona chu ‘mega partnership’ tiin a sawi.
Modi-a hian Trump-a’n India pawh tela tun hnaia US sumdawnpui ramte laka chhiah lak thin tam tak a tihsan mek laiin ni hnih chamin Washington a tlawh.
An pahniha an infak tawn karah Trump-a chuan India chu sumdawnnaa chhiah la sang ber ram a nih avangin a sawisel a, ‘harsatna lian tak’ a tlin thin a sawi bawk.
Indian hruaitu hian sumdawnnaa khuahkhirhna an kalpuite nep zawka kalpui dan tur a sawi a. US bungraw lak luhna tihhniam te, dan lova US-a Indian lutte thawn haw dan tur te leh US atanga sipai indo thlawhna lei dan turte pawh a sawi bawk.
An inkawm zawha thuthar lakhawmtute an kawm dunnaah Modi-a chuan Trump-a chuan ‘make America great again’ tih a aupui thin tipuitling turin thil a ti nasa tih a sawi a, India pawh a tiropui thar leh dawn tih sawiin, “It’s Make India Great Again – Miga,” a ti bawk.
“Maga leh Miga belh chu ‘than zelna tura thawhhona lian’ tihna a ni,” a ti bawk.
Trump-a chuan India hian ram pahnih sumdawnna hniam mek tithaa inpawh thar leh nan ‘tuialhthei leh boruakalhthei tam tak a lei dawn’ tih a puang.
“An mamawh a, keiniin kan nei ve thung,” a ti.
Trump-a hian US chuan sipai hmanrua maktaduai tel man India hnenah a hralh dawn tih a puang a, Delhi hian F-35 fighter jet a leisak ang.
Hruaitu pahnihte hian pem chungchang pawh an sawi dun a, Trump-a chuan US-in kum 2008-a Mumbai beitu mi firfiakte chu ‘India-a an chungthu rel turin’ a thawn let dawn tih a puang bawk.
Modi-a hian Trump-a hnenah hian US-a dan lova Indian awmte thawn let chungchanga a rawtna a pawm avangin lawm thu a hrilh.
Kar hmasa khan US hian a sipai thlawhna hmangin Indian 104 a thawn haw a, video darhah an enkawl dan a tha lo hle tih a lang a. Thlawhna pahnihna hi Inrininiah India-a tum leh hman tura beisei a ni.
Indian-te hi US-a dan lova awm tam ber pakhat an ni a. Hengho hi H-1B visa hmanga awm an ni tlangpui a, hei hi Trump-a hian a hun hmasa khan a lo khap tawh a, tunah pawh khuahkhirh leh deuh a tum bawk.
Modi-a nena an inkawm hnu lawkah hian Trump-a hian US sumdawnpuite atanga chhiah a lak thin chu tihsan turin a ti thar a hei hi April 1 atanga hman tan a nih a rinawm.
An rama ram dang thil lak luh man a san hi a risk sang hle mah se American thil siam a pun phah ang a, hna pawh a tam phah dawn niin a sawi a ni.
Trump-a hian ‘kan thawhpuite aiin kan hmelmate hi an tha lo zawk’ tiin thil lak luhna man chungchangah hian a sawi bawk.
“Kan lakah fair lo takin thil an kalpui,” tiin Republican president hian Modi-a nen an inkawm hma lawkin a sawi a. “Mi tin hian US lakah hian remchang an dap a ni,” a ti.