US-India inremnaah Jet engine pawimawh

Prime Minister Narendra Modi an US a tlawhah ram pahnihte chuan defence lam, space technology, AI leh thil dang dangah thawhhona thuthlung an ziak a. US-India thuchhuah intawm chuan inremna chhinchhiahtlak an ziah an tarlanah India rama General Electric (GE) leh Hindustan Aeronautics Limted (HAL) tena GE F414 jet engine, Light Combat Aircraft (LCA) Mk2 tena a hman tur siam tur chu a tel a ni.
Senior Defence Ministry official chuan commercial term neuh neuh te tih loh chu tihfel tawh tia sawiin US Congress remtihna la ngai a ni a, he inremna hmang hian producton technology 80% chu India ramah transfer-in a awm dawn a ni.
“Contract ziah hnuah engine hmasa ber siamchhuah nan kum thum vel ngai tura ngaih a ni a. HAL hnenah 80% technology transfer a ni ang a. Technology sang lamah hetiang ang thil hi India rama thleng a la awm ngai lo,” tiin official chuan a sawi a. F414-INS6 engine chu tlemte tih loh chu India rama siam chhuah vek tur a ni tiin a sawi bawk.
US hian technology sang leh pawimawh te a roh hle a, export control leh licensing system khauh tak a nei a. Tuna inremna pawh hi US Congress-in remtihna a pek a ngai a, Congress chu bipartisan ni mek mah se, India thian ve ve an nih avangin a tlang tura ngaih a ni.
Inremna siamfel theih a nih chuan ‘Engine Development Agreement’ hnuaiah engine technology pum deuhthaw chu GE leh HAL ten an kalpui dawn a. Chu chu khawvela democracy ram lian ber leh upa berte inkara technology lama thawhhona ropui tak tur a ni bawk.
GE-in technology transfer a kalpui hmangin Indian industry te public leh private te chuan an theihna leh skill neih te chu India rama manufacturing nasa zawka tih nan an hmang thei dawn bawk a ni.
Jet engine siam thei hi ram tlemte chauh awmin chungte chuan an utawk tur vawn vek a, India pawhin tun hma atangin siam tuma beiin ‘Kaveri’ project a kalpui a, a hlawhchham thung. Kaveri project hi kum 1989-a kalpui daih tawh kha niin kum 30 dawn hnuah Rs 2035.56 crore chuang sen a nih hnuah tihtawpin a awm a ni.
F414 engine te hi India siam LCA-Mk2 tena an hman tur niin a aia tha zawka siam zel tum pawh niin hei mai bakah hian Advanced Medium Combat Aircraft (AMCA) kalpui mek tena an hman theih tur a ni bawk. F414 hi IAF te hman mek LCA_Mk1 leh LCA-MK1A hman F404 engine power tur a ni bawk a. F414 engine hi chuan 98kN thrust pe chhuak theiin F404 engine te chuan 84kN chauh a pe chhuak thei thung.
Nikum August thla khan Cabinet Committee on Security (CCS) te chuan Rs 9,000 crore sengin LCA-Mk2 siam ni se a ti a, heta tang hian Rs 2,500 crore chu sen a ni tawh a. LCA-Mk2 hi kum 2024-ah tlangzarh hman tum niin kum 2027 ah test flight neih hman beisei niin Defence Research and Development Organisation (DRDO) officials te chuan an sawi a. AMCA atana CCS sanction pawh pekchhuah mai theih ni dawna sawi a ni bawk.
LCA-Mk2 ah hian tun lai thiamna changkang ber ber te Onboard Oxygen Generation System te pawh a tum khat nan bilh tel ni dawna sawi a ni a. Hei bakah hian heavy weapons class of Scalp, Crystal Maze leh Spice-2000 te pawh a keng tel thei dawn bawk a. Mk2 hi Mk1 aiin 1,350 mm a sei zawkin payload a ken theih pawh sang zawkin Mk1 in 3,500kgs a ken theih laiin Mk2 chuan 6,500kgs a kel tel thei thung.
F414 te hi F/A-18 Super Hornet te Swedish Gripen te pawhin an hman a ni a. F404 nen a basic design erawh a inang thung a. Tuna inremna siam hmang hian GE te chuan India-in 110kN jet engine siam a tumah pawh Saffran, France leh Rolls Royce, UK te ai pawhin dinhmun tha zawkah a awm dawn an ti bawk.