US leh China-in inbiak zui zel turin hma la

US leh China te chuan US Secretry of State Antony Blinken an ni hnih chama Beijing a tlawh hnuah inzawmna siamthat tuma hmalak zui zel an remti dun ta.
Blinken hian China President Xi Jinping chu hmuin ram pahnihte chuan high-level communication an tna tha leh dawn a ni.
Xi chuan hmasawnna an neih thu sawiin Blinken pawhin ram pahnihte chuan inbiakna neih zui zel an remti tiin a sawi bawk a. Mahse, US diplomat chuan inmil lohna nasa tak erawh an la neih tho thu a sawi a ni.
“Inelna in buaina a hrin loh nan senior level ah inbiak pawhna tha neih chu harsatna chinfel nan kawng tha ber a ni tih ka sawi a ni” tiin Blinken chuan Tiannamen Square a great Hall of the People a minute 35 Xi Jinping nena inbiakna an neih hnuah a sawi.
“Chutiang chiah chu Chinese lam kan thawhpui te sawi dan pawh a ni a, kan inlaichinna ngelnghet zawka siam kan duh a ni” tiin Blinken chuan a sawi bawk.
Kum 61 a upa Blinken chuan China laka an duhdanah an chian thu sawiin issue thahnem tak an ngaihdan inang pawh a awm thu a sawi bawk.
Beijng leh Washington inlaichinna hi Trump hunlaia trade-war atanga nasa zawka chhia niin hei bakah hian Beijing-in Taiwan laka inlulinna nasa zawk a kalpui leh kumin kumtir lama Chinese spy balloon US a kahthlakte chuan a tichhe zual a ni.
Blinken hi kum nga dawn hnua US senior diplomat Beijing tlawh leh hmasa ber a ni a. Xi nen hian Ukraine a Russia indona te bakah America a fentayl crisis leh Taiwan chungchang te, North Korea leh China in human rights a bawhchhiatna nia sawi te chu sawihona an nei vek tiin US state department thuchhuah chuan a sawi bawk.
Inbiakna neihah engmah hmalakna tur thuchiang fak sawi emaw remtih ni lo mahse ram pahnihte chuan inbiakna neih chhunzawm zel nan kawng na hawnga ngaih a ni.
“Ram pahnihte chuan hmasawnna neiin thil thenkhatah chuan inremna pawh an nei a, thil tha tak a ni” tiin US state department thuchhuah chuan a sawi bawk.
Xi nena inhmuh hi Blinken a original schedule a awm a ni lo va, an inbiak tur thu pawh an inbiak hma darkar khat vel lekah puan lan a ni chauh a ni.
Blinken hian China a cham laiin Xi Jinping a hmuh hmain China top diplomat Wang Yi leh Foreign Minister Qin Gang te pawh a lo hmu tawh bawk.
US president Joe Biden leh Washignton official te chuan China chu hmelma ang ni lovin elpui angin an ngai tiin an sawi a. Mahse, tun hnaiah inelna military leh economic lama hmalakna chu duh aiin a sosang mah mah tia sawi a ni.
Ram pahnih hruaitu lawk te inhmuhna hmangin Xi pawhin Chinese mipuite hnenah a sorkar chuan Washington nena inlaichinna neih a duh tiin a sawina anga ngaih a ni a. Ram pahnih tena inbakaihna an neih lian ber pakhat chu Taiwan chungchang a ni bawk.
China chuan Taiwan hi a ram atanga inla hrang engtik hunah emaw mainland China nena la inzawm turah ngaiin Xi Jinping chuan a tul nih chuan Taiwan chu sipai chakna pawha lak mai tur a ti reng a. Mahse, Tawain chuan mahni inrelbawl ram angin a inngai ve thung.
Taiwan hian Chinese mainland nena inawmna neih a duh lo va, amahin constitution hran neiin mipui thlan sorkar a awm bawk a. Nikum khan US President Joe Biden chuan US chuan China in Taiwan a bei a nih chuan a chhan tur thu a sawi hmiah bawk.
Blinken chuan Washington chuan taiwan independence a thlawp lo tia sawiin chutih rual chuan China in Washington chan economic hmangin hrekbeh a tum nia an ngaihna pawh a dik lo tiin a sawi bawk.
Hei mai bakah hian China chuan US hnenah Ukraine indona a hman turin China chuan Russia hnenah ralthuam hlauhawm a pe dawn lo tiin a sawi bawk a. Mahse, China chuan US in ram pahnih sipai tena inbiakna tha an neih theih nana hmalak ni se a tih chu a hnawl thung.
US Secretary of State Antony Blinken chuan China a tlawh chuan hun reiah rahtha a chhuah a beisei thu sawiin, “Hmasawn hi a har a, hun a mamawh. |um khat intlawh, zin leh titi a neih mai theih a ni lo” tiin a sawi.