US leh China-in Trump-Xi inbiakna tur thil tifel lawk

US leh China-in Trump-Xi inbiakna tur thil tifel lawk
US leh China chuan tun kar tawp lama an hruaitute an inbiak huna an sawi dun ngei tura ngaih lawk sumdawnna thila inremna turah inremna an nei ta tih US treasury secretary-in a sawi.
Scott Bessent-a chuan CBS hnenah an hruaituten inremna an siamna tura an lo tihfel lawkah hian US-a TikTok kalpui dan tur leh China-in leilung hausakna vâng bik a khuahkhirhna tihnepna tur pawh a tel tih a hrilh.
US President Donald Trump-a’n Chinese bungrua an lak luha chhiah 100%-a sang tura a vau lawkna pawh kalpui a nih hmel loh tih a sawi a, China hian US atanga bekang an lak luh zui theihna tur a tel tih a sawi bawk.
Khawvela ram hausa ber pahnihte hi sumdawnnaah inbei nasa hle mah se intihbuai chhunzawm zelna tur erawh pumpelh an duh ve ve.
Trump-a leh Chinese President Xi Jinping-a hi Ningani hian South Korea-a inbe tura tih lawk tawh an ni.
Bessent-a hian Chinese sumdawng hotu liante Malaysia-a Association of Southeast Asian Nations (Asean) summit-ah a kawm a, Trump-a pawh intawh khawmah hian Asia a fan rualin a tel a. Beijing chuan sawihona ‘tha tak’ a nih thu a sawi.
Bessent-a hian ‘hruaitu pahnihte tan ruahmanna an siamsak’ tih a sawi a, “Tariff pawh kalpui a ni lo vang,” a ti.
Chinese sorkar pawhin ram aiawha dawrtuten ‘lehlam lehlamin an ngaih pawimawh thilah inhre thiam tawna thil kalpui dan tur an tifel’ tih a sawi a. “Kal dan tur kimchang sawi atan indawr zel a ni ang,” an ti.
Trump-a hian White House a luah leh hnuah ram dang atanga bungrua an lak luhah chhiah sang lain an rama thil siamna tihhlawkna tur leh hna siamna tur a nih thu a sawi.
Chhiah a laksak sang ber zingah China hi a tel a. Beijing pawhin a ti let ve a, ram pahnihte hi sumdawnna thilah indawr zuiin inchin fel dan tur an dap zui.
Tun thla tirah khan Trump-a hian China-in leilung hausakna vâng chi, electric bungraw siamna atana pawimawh thawn chhuah a khuahkhirh chhan let nan November thla atangin Chinese bungrua an lak luhah chhiah 100%-a sangin an la dawn tih a sawi thar leh.
China hian khawvel puma leilunga thil vâng chi 90% hi a khawih a ni a, hengte hi solar panel atanga smartphone thlenga hman niin US pawhin a leisak tam hle.
Beijing hian kumin kum tira Trump-a’n Chinese bungruaa chhiah a tihsan khan a lo khuahkhirh tawh bawk a, US firm tam tak an phun nasa hle.
Inbiaknaa sawi lian dang chu bekang a ni a, China hi khawvela a lei tam ber ram a ni a. An inep atang khan a leisak lo nghal a, US-a lo neituten an tuar hle.
Bessent-a hian US bekang lei an chhunzawm leh thuai dawn tih a sawi a, a kimchang erawh a sawi lo.
Video-sharing platform TikTok chungchanga Trump-a leh Xi-a indawr dan tur pawh an tifel niin Bessent-a chuan a sawi a. US hian Chinese neitu, ByteDance hnuaia US-a hman chu an ram him nan tha lovin an ngai a ni.
TikTok chuan US-a hman theih turin an ram ngei atanga enkawlna tur hralh emaw, tihtawp emaw an lo sawi tawh thin a. Trump-a’n khap a tumna vawi li chu indawrna hmanga tihkhawtlai a ni a, tuna tihkhawtlai mek hian December thleng a awh dawn.
White House chuan thla hmasa khan US company-ten an enkawl dawn tih a sawi a. Trump-a hian a president hmasak khan TikTok khap hi a duh tawh a; mahse, a hnuah kum 2024-a president-a a campaign lai khan thalaiten an hman nasat avangin amah pawhin a thatpui hle bawk.