US leh India palaite ni li chhung inbe tan dawn

US leh India palaite chu February-a a ruangam lo pawm tawh, sumdawnnaa thawhhona inremna (trade pact) chipchiar taka tihfel a nih theih nan ni li chhung inbiakna an tan dawn.
US team hi an chief negotiator Brendan Lynch-a’n a kaihruai dawn a. India aiawha palai hotu ber chu Darpan Jain-a a ni a, ani hi Department of Commerce-ah additional secretary a ni.
Commerce ministry chuan, “Inremna lailawk siam tawh chipchiar zawka tihfela bilateral trade agreement (BTA) huam zau zawk hnuaia inbiakna kawng hrang hrang, thil zawrh theih chin, chhiah inlaksak lohna tur chin, chhiah leh sumdawnna kaihhnawih, investment tihhmasawn leh economic security-a kal rual dan turte rawtna siam an ni,” a ti.
February 7 khan India leh US hian thuchhuah siamin, BTA chu a thuphunga pawmin a ruangam an lo duang tawh a. Tunah hian chu inremna tak tak atana dan anga thil tih tul ngai, thu ziah turte chu an pahnih hian an tihfel a ngai dawn a ni.
Inremna ruangamah hian India leh US inbiakna zau zawka kalpui tura dah a ni.
Inremna kalpui dan tur ruangam ang chuan US chuan India laka chhiah a lak chu 50% atangin 18%-ah tihhniam a remti tawh a. Russian tuialhthei a lei avanga Indian bungruaa chhiah a lak 25% chu a paih tawh a, a bak 25% chu inremna hnuaiah 18%-ah tihhniam a tum a ni.
Hetih lai hian February 20 khan US Supreme Court chuan President Donald Trump-a’n ram dangte laka chhiah sang a la vak vak chu a lo dodal tawh bawk a, hei hi 1977 International Emergency Economic Powers Act (IEEPA) hnuaia tih a ni.
Hemi hnu hian president chuan ram zawng zawngah ni 150 chhung chhiah 10% lak a nih tur thu a puang a, February 24 atanga hman tan a ni ang.
Heng thil inthlak avang hian India leh US inbiaknaa palaite thutkhawm tur chu February-a neih tur ni mah se sawn a ni a. April thla khan Washington-ah an inbe leh ta a, Jain-a kaihhruai Indian team hi April 20-23, 2026 chhung khan America-ah an kal a ni.
US palaite chu indawr chhunzawm zel turin June 1-4 chhung India an tlawh ve thung dawn a ni.
Inremna tur ruangam duan hnuaiah hian India chuan US industry bungrua zawng zawng leh US ei tur leh lo atanga thar chhuah kaihhnawih hrang hrang, dried distillers’ grain (DDG), ran chaw atana red sorghum, tree nut, thei thar leh sawngbawl, bekang tel, uaiin leh spirit leh thil danga chhiah lak chu tihbo emaw, tihhniam emaw a rawt.
New Delhi chuan kum nga chhungin USD tluklehdingawn 500 man US energy product, thlawhna leh a part, thir lam chi hlu bik, technology product leh coking coal lei a tum thu a sawi bawk.
Tun tum inbiak hi a pawimawh viau dawn nia sawi a ni a, India hian a inelpui ramte aia dinhmun tha neih theihna kawng a zawng dawn a. Tunah chuan US sumdawnpui ram dang zawng zawngte chuan chhiah 10% lak inang tlang an hmang tawh a, Delhi pawhin chhiah hniam lam a nawr ve dawn a ni.
US hi kum 2025-26 chhung khan India sumdawnna lama thawhpui lian pahnihna a ni a. India-in US-a bungrua a thawn chhuah chu kum kal ta chhung khan 0.92%-in a pung a, USD tluklehdingawn 87.3 a ni a, a lak luh pawh 15.95%-in a pung a, USD tluklehdingawn 52.9 a ni thung a. Trade surplus hi kum 2024-25-a USD tluklehdingawn 40.89 a nih laiin kum 2025-26 khan USD tluklehdingawn 34.4-ah a tlahniam a ni.