US nena eibara kan hlawkpui ve ve tur inremna kan duh – Iran

US nena eibara kan hlawkpui ve ve tur inremna kan duh – Iran
Iran chuan US nena a thawh hnih nana an inbiak leh hma lawkin nuclear kaihhnawiha inremna siam an tum chu ram pahnih tana eibara hlawk tur ve ve an duh tih an ram palaiin a sawi.
Tehran leh Washington hian tun hnaiah Iran-in nuclear programme a neih chungchanga kum tam tak inmil lohna an neih leh sipai chakna nena an inep mekna ching fel turin tun thla atangin an indawr thar leh mek a. US hian an inbiakna a tlawlh hloh a nih chuan che thei turin indo thlawhna phur lawng lian pahnihna tir leh tawh nghe nghe.
US Secretary of State Marco Rubio-a chuan Bratislava-a thuthar lakhawmtuten an kawmnaah President Donald Trump-a chuan palaia indawra chin fel chu a duh ber a nih thu a sawi a, rah tha a chhuah dawn em tih erawh a chiang chuang lo tih a sawi.
“Tute mahin an la tih theih loh, Iran nena inremna siam tumin kan bei mek a ni,” a ti.
Iran hian US sipaiten an bei a nih phawt chuan Middle East-a US hmunpuite an bei ve dawn tih a lo sawi tawh thin a, hei hi a taka thleng tur angin a la lang rih lo.
“Inremna chu a awm dawn em tih hriat ni lo mah se US pawhin an hlawkpui theih tur a ni ang,” tiin foreign ministry deputy director for economic diplomacy Hamid Ghanbari-a chuan a sawi.
“Tuialhthei leh boruakalhthei, thil laih chhuahnaa sum thawh, thlawhna lei thlengin inremnaah hian kan thil tum ve ve a ni,” a ti a. Hei hi kum kum 2015-a nuclear inremna an siam, US-in a ngaihven tel loh ang kha a ni.
Kum 2018 khan Trump-a hi he inremna atang hian a inhnukdawk a, Iran chu a nuclear programme avanga hrekin eibarah pawh Tehran hi a hrek tel.
Steve Witkoff leh Jared Kushner telin US aiawhte chuan Iranian thuneitute chu Thawhlehni hian Geneva-ah an inkawm leh dawn.
“Witkoff-a leh Kushner-a an zin ang a, inkawmna pawimawh takah an tel dawn a, an sawi chhuah chu kan la hre thuai ang,” tiin Rubio-a chuan a sawi.
Kum 2015-a nuclear inremna kha ram dangte pawh telna a ni a, tuna mi erawh Iran leh US inkar bik niin Oman chu an kara palai a ni.
Iranian Foreign Minister Abbas Araqchi pawhin Tehran chhuahsanin Geneva a pan tawh a, US bakah hian UN hnuaia nuclear thlithlaitu, IAEA hotute leh mi dangte a kawm nghal dawn niin a ministry chuan an sawi.
June thla khan US leh Israel tangrual chuan Iranian nuclear hmunhmate an lo bei chiam tawh.
US hian Iran hi eibarah a nawr na hle bawk a. Kar hmasa tir lama White House-a Trump-a leh Israeli Prime Minister Benjamin Netanyahu-a inkawm khan US chu Iran-in China-a tuialhthei a thawn thin titlem tura nawr turin an inrem bawk niin Axios chuan a tar lang.
China hian Iran-in tuialhthei a thawn chhuah 80% chuang leitu niin an thawn tlem chuan Tehran-in tuialhthei atanga sum anhmuh a tlem phah thei hle dawn a ni.