US palaiin miniter leh CS kawm

US palaiin miniter leh CS kawm
Mizoram tlawhtu US Consulate General Kolkata-a consul general Melinda Pavek chuan Thawhlehni khan minister Dr R Lalthangliana chief secretary Dr Renu Sharma te a hrang ve ve in a kawm.
Commerce leh Higher & Technical Education minister Dr R Lalthangliana chuan Mizoram chu Bangladesh leh Myanmar nen ramri thui tak intawm a nih avangin ramdangte nena insumdawntawnnaah hei hian kawngro thui tak a su tih a sawi a. Ram pahnih inkarah thawhhona tha awm zel se a duh tih sawiin, Mizo zirlaite leh zirtirtuten America-a ‘exchange program’ an neih theihna’na hma lakpui tur leh zirlai harsa zawkte tana tanpuina pe turin consul general hi a ngen a ni.
Mizoram chu India rama nau piang boral tlemna ber, ziak leh chhiar thiam tam ber dawttu state leh NITI Aayog tihchhuah Health Index–a state tenau zinga titha ber a nih thu Health minister ni bawk Dr R Lalthangliana hian a sawi a. Covid hri dona kawnga kohhran, khawtlang leh tlawmngai pawlte hmalakna leh tawiawmna chu thil chhinchhiahthlak tak a ni tih a sawi. HIV/AIDS, Cancer, Malaria leh TB vanga harsatna tawh mekte titawp turin thawhho that a tul tih a sawi bawk.
Consul general chuan Mizoram sawrkar hmachhawp hrang hrang chu lawmawm a tih thu a sawi a. Sawrkar nen thawhhona tur kawng tam tak a awm a ni, tiin Mizoram harsatna hrang hrang – HIV/AIDS, Cancer leh a dangte thlirho a, tihtawp an nih theihna’n theihtawp chhuah a tul tih a sawi.
Mizo zirlai leh zirtirtute chu America-a zirna sang zawk zir tura a duhsak thu a sawi a. US-India Education Foundation, EducationUSA, Fullbright Scholarship leh American online library-te hmang tangkai turin a chah.
Chief secretary hian Mizoramin hmasawnna kawng a zawh mek dan leh sawrkar hmalakna a lo hrilh a. Mizoram sawrkar leh US thawhdun theihna tur tamtak zingah inkalpawhna, eitur leh mau sawngbawlna, tourism, hriselna, sumdawnna, thilthar hmuhchhuah leh mahni kea din theihna lamte a nih thu sawiin, hengah hian thawhhona tha a awm chuan Mizoramin chak zawkin hma a sawn theih tur thu a lo hrilh.
US consul general chuan India leh US inkarah inlaichinna tha tak awm chu Mizoram tan pawh rah tha a chhuah ngei a beisei tih sawiin, chief secretary thuhrilhte chu ngaihpawimawh a nih tur thu a sawi a. Ram pahnihte inkarah thawhhona tha zawk a awm theihna’n kawng tamtak zinga a ngaihpawimawh zual – mipui leh mipui inkarah inpawhna tha zawk, zirlai leh sumdawngte visa pekchhuah kawngah, cyber security, solid waste management, industry leh hriselna lam a nih thu sawiin, chak zawka hma lak a nih theihna’n thawhpui turin Mizoram sawrkar a sawm a ni.