US sipai document pawimawhte put ru

Classified American Defence Department documents – maps, charts leh thlalak hrang hrangte chu internet-ah a darh niai nuai a. Timeline hrang hrang leh military acronym hriatfiah thei loh tam tak awmin chung document te chu Ukraine indona kaihhnawiha ‘top secret’ tih te a ni hlawm vek a.
Document hmang chuan nunna chan leh hliam tuar zatte, an chak lohna te, an chakna te bakah Ukraine in spring offensive a kalpuia an dinhmun dik tak te pawh tarlanin a awm bawk.
Heng document pawimawh lutuk te, thlalak nena khat chuai mai te mi pangngai en theih tura a awm hrim hrim le? Chung document hmang chuan Kremlin kan la hriat fiah loh chu a lang chiang em?
A hmasa berah chuan tun hi thla 14 kaltaa Russia-in Ukraine a run hmua American information putru turu ber a ni a. Document thenkhat chu kar ruk kalta leka mite niin mahse a nghawng a na hle.
Pentagon officials te pawhin he document hi a tak ngei a ni tih an sawi nia sawi a ni a. Document 100 velah chuan kimchang taka thil lantirna a awm nia sawi a ni a.
Ukraine hnena training pek leh ralthuam pek dan kimchang te, tank leh artillery bakah armoured vehicle hman tur te pawh kimchang taka tarlan a ni a.
Thil hrang hrang kimchang taka tarlan niin chung zingah chuan US chuan Russian sipai nunna chan leh hliam tuarte chu 189,500 atanga 223,000 vel turah an dah a. Ukraine pawhin sipai 124,500 atanga 131,000 vel hliam leh nunna chan an awm angin a ngai bawk.
Zawhna awm ta ber chu heng document te hi tuin nge ti putru tih chu a ni ber a. Heng document te hi messaging platform Discord atangin 4Chan leh Telegram thlenga darh tawhin investigative open source intelligence group Bellingcat ami Aric Toiler chuan a sawi a.
Toler chuan a puhrukna bulthut chu an la hriat theih loh thu sawiin mahse a lan danah March thla tir lam khan mesaging platform-ah hmuh a ni tawh, a ti.
4 March khan Discord a Ukraine indona sawihona neihah user pakhat chuan ‘hei hi document putru thenkhat a ni’ tiin a post a, a hnua document 10 a post zui a, Discord hi computer game Minecraft players tena an hman rim tak a ni.
Kum 2019 khan UK general election neih hmain US-UK trade lama inlaichinna chu Reddit, 4Chan leh site dang dangah a put ru tawh bawk a. Khatih lai khan Reddit te chuan post chu Russia atanga chhuak tiin an sawi.
Tuna document put ru erawh tun hma zawng put ru te aia nghawng nei na zawk thei a ni a. Ukraine chuan langsar takin an ‘operational security’ te chu a puhruk loh nan him taka a ven thu a sawi.
Hetihlai hian Kyiv a officials te chuan Russia-in disinforamtion campaign a kalpuina a ni thei tiin an sawi a, mahse, military blogger thenkhat chuan khawthlang ram tena Russian commander te bum an tumna an ti ve thung.