US-UK insumdawn tawnna tifel thuai dawn

US-UK insumdawn tawnna tifel thuai dawn
US leh UK inkara sumdawnna tura inremna tur chu ‘a thleng thuai dawn’ tih President Donald Trump chuan Sir Keir Starmer-a nen thuthar lakhawmtute an kawm dunnaah a sawi.
Prime minister-in White House a tlawhnaah US-in a sumdawnpui ram thenkhatte thil lak luh man tihtova a vau mek laiin Trump-a chuan UK hi chuan hei hi a pumpelh dawn nia ngaih theih turin a sawi.
Trump-a hian tun hnaiah sumdawnna thil bakah Ukraine chungchangah thutlukna hraw tak tak a siam lai a nih avangin Sir Keir-a’n US a tlawh hi thuneihna a chan chhunga a thiltih langsar ber pakhat a tling.
Sir Keir-a hian White House a tlawh hi King Charles-a’n a vawi hnih nana UK tlawh tura Trump-a a sawmna lehkha a hlan atangin atan.
Oval Office-a thlalatute hmaa lehkha a dawnah Trump-a hian ‘inchawimawina ropui tak’ a nih thu leh King chu ‘pa tha tak’ a nih thu a sawi.
Sir Keir-a pawhin a vawi hnih nana tlawh tura sawmna chu ‘chhinchhiah tlak’ a tih thu a sawi a. Tih dan Thinah US president-te hian UK hi vawi khat chauh an tlawh hlawm.
Sawmna a dawn chu a pawm thu Trump-a pawhin sawiin Sir Keir-a nen hian thuthar lakhawmtute zawhna hrang hrang darkar chanve vel an chhang dun.
US president-a hi zawhna chhangtu tam zawk niin thil hrang hrang an sawi a, Ukraine nena inremna an neih dan tur leh UK-in Mauritius nena Chagos Islands chungchanga inremna neih tur te pawh an sawi lang dun.
Thlawhnaa US a pan laiin Sir Keir-a hian inremnain a ken tel turin Ukraine-a British sipai thawn lut a duh thu a lo sawi tawh.
Hetih rual hian US venhimna pek tel lo chuan Russian President Vladimir Putin-a’n Ukraine chu a rûn nawn leh mai a hlauh thu a sawi bawk.
A thil tum hi president a hrilh dawn em tih chungchanga zawhna chu prime minister chuan Trump-a leh Ukraine-in Zirtawpnia leilung hausakna thila inremna an ziah turin a hril tur thu a sawi.
Leilung hausakna inremna hnuaia US mi hna thawkte Ukraine-ah an awm chuan ‘tumahin an tibuai ngam dawn lo’ niin a sawi a ni.
US president-in Ukrainian President Volodymyr Zelensky-a ‘dictator’ tia a sawi chungchang a sawi chhuak dawn em tih erawh Sir Keir chuan, “Ka sawi ang maw? Ka sawi ka ring lo,” a ti.
Zirtawpnia Washington DC-a a kawm tur tho, Zelensky-a chu zahawm a tih thu a sawi bawk.
UK hian Chagos Islands chungchanga Mauritius nen inremna siam an tum chu UK leh US hruaitute inkara inmil lohna thlen thei a ni.
Hetih lai hian Trump-a chu UK thiltih tum tha titu angin a lang leh mek thung.
Inremna hi an siam a nih chuan UK hian Indian Ocean-a thliarkar awm khawmah hian thuneihna thuk zawk a nei dawn a, US-UK military airbase awmna, Diego Garcia chu a thunun thei ang.
Oval Office-a thuthar lakhawmtute an kawm zawhah hian hruaitu pahnihte hi inbiain thuthar lakhawmtute an kawm leh a. Trump-a hian US-UK sumdawn inremna chu ‘rang taka tifel turin’ an pawm dun tih a sawi.
Eibar kawnga thawhho bakah hian sumdawnna thila UK leh US Tanhona turah hian artificial intelligence lam pawh a tel dawn niin an sawi.
Trump-a hian tun hnaiah an thawhpui ram eng emaw zat aTanga an ramin bungrua a lak luhna man a tisang a, European Union siam bungraw lak luhna pawh 25%-in a tisang.
Steel leh aluminium lak luh man pawh 25%-a tihsan tura tih niin hei hian UK pawh a nghawng dawn.
Sir Keir-a hian hemi chungchang hi sawiin tihhniam a tum em tih zawhna chu Trump-a chuan, “A tum,” a ti.
“A thawk rim a, a thawh hlawh pawh pek a ni ang,” a ti a. “Inthian tha ram hnih inkarah hian thil tha taka tifelin insumdawn tawnna tak tak pawh kalpui a ni ang a, chhiah inlaksak velin pawimawhna a nei lo,” tiin thil man tihsan hi a ti ve dawn lo anga ngaih theihin a sawi a ni.
President-in UK laka chhiah a lak tur chungchangah Sir Keir-a pawhin US-UK insumdawn tawnna chu ‘dik, inbuktawk leh inrintawkna’ nen tih a ni tih a sawi ve bawk.
European Union a chhuahsan hnuah British hruaitute hian US nena zalen taka insumdawn tawn hi an duh zel.