V-Day pual thisen pek unit 663

V-Day pual thisen pek unit 663
February 14 – Valentines Day pualin Mizoramah a thlawnin thisen unit 663 pek a ni.
Association for Voluntary Blood Donation leh MSACS chuan National Health Mission leh Blood Bank nen Zirtawpni khan Mizoram hmun hrang hrangah Valentines Day pualin thisen pek runpui an buatsaih a. Aizawla hmanpuitu NHM mission director Dr Eric Zomawia chuan a thlawna thisen pekah Mizoram chu India rama a tha pawl a ni a, Mizo thalai tlawmngaite vang a ni tih a sawi. Thisen pek uar zel tura thalaite sawmin, chutiang tur chuan hriselna ngaipawimawh a, taksa hrisel tha zawk neih theihnan kea kal tam a, zuk leh hmuam leh ruihtheih thil laka fihlim turin a chah.
AVBD president C Lalnunnema pawhin sawrkar kum kal meka AVBD-in voluntary blood donation target a siam chu 92% a ni, tiin, “Mizo thalaite tlawmngaihna leh thahnemngaihna avangin kan target hi kan tlin ngei kan beisei. Damlo thisen mamawhtu an pung zel a, thisen hi siam chhuah theih a nih loh avangin damlote mamawh phuhru tur chuan thisen petu an awm a ngai a, thisen pek hi kan uar zel a ngai,” a ti.
Blood donation camp hi nilengin neih a ni a. Aizawlah chuan MDM (Music Domain Mizoram) leh Youth Icon 2024 top 10-te nen tang tlangin huaihawt a ni a. Blood Donation Camp buatsaihna atan hian Aizawla private hospital lian hoin sum leh paiin an pui a ni.
Valentines Day pual hian Civil Hospital Aizawlah unit 304, ZMC&H ah unit 86, Synod Hospital-ah unit 12, Lunglei Civil Hospital-ah unit 101, Champhai Hospital-ah unit 42, Kolasib Hospital-ah unit 78 leh Siaha Hospital-ah unit 40 pek a ni.
Valentines Day puala thisen pek hi kum 2010 khan tan a ni a, kumtin buatsaih zui niin, kumin hi a vawi 16-na a ni. V-Day puala thisen pek huaihawt tawhah hian Mizoram pumah 2010-2024 chhung khan thisen unit 10958 pek niin, kumina pek nen hian unit 11621 a ni.