Vaibelchhe 10,000 chuang ralthuam leina tur inremna ziak

Vaibelchhe 10,000 chuang ralthuam leina tur inremna ziak
Indian sorkar chuan Ningani khan Rs. vaibelchhe 10,000 chuang man tur ram venhimna hmanrua, Pinaka multiple launch rocket system atana hman tur, Area Denial Munition Type-1 leh rocket tha chi leina atan inremna ziah a ni tih a puang a, hei hian Indian Army chu nasa taka a tihchak beisei a ni.
Defence ministry chuan Shakti software tihchangtlunna atan Bharat Electronics Limited (BEL) nen contract an ziak bawk tih a puang.
Ministry chuan contract-te hi Economic Explosive Limited (EEL) leh Munitions India Limited (MIL) nen ‘Rs vaibelchhe 10,147 man tur Pinaka Multiple Launch Rocket System (MLRS) atana hman turin Area Denial Munition (ADM) Type-1 (DPICM) leh High Explosive Pre Fragmented (HEPF) Mk-1 (Enhanced) rocket leina turin ziah a ni’ tih an tar lang.
“HEPF Mk-1 (E) rocket-te hi tuna hman mek, HEPF rocket changkang zawk niin thui zawk a kap thei a, a kap dikin a hlauhawm zawk bawk,” an ti.
Contract-te hi Defence Secretary Rajesh Kumar Singh-a hriatpuinain New Delhi-ah ziah a ni.
ADM Type-1 hian ‘ralthuam tha bik’ neiin a kah fuhah huam zau takin hna a thawk thei a, lirthei leh mihring kah nan pawh hman theih a ni a. Hmun tum bik riau neihah pawh hman theih a ni tih ministry chuan a tar lang.
ADM Type-1 (DPICM) leh HEPF Mk-1 (E) rocket leina atana contract ziah a ni ta hi artillery rocket regiment-te tan an hmanraw tihchangkanna tura ‘mellung pawimawh tak’ a nih thu thuneituten an sawi.
ADM (DPICM) leh HEPF ralthuam leina tur contract ziah hi Indian Army ralthuam tihchangtlunna tur a nih piah lamah India-in ama kea din a tumna kawnga a MSME-te a tawiawmna tur tha tak niin hna pawh tam tak a siam belh dawn niin defence ministry thuchhuahah tar lan tel a ni.