Vaihlo leh Mizoram

Mizorama vaihlo leh a kaihhnawih dona ni, Mizoram State Anti-Tobacco Day vawi 11-na chu nimin khan H&FW minister hovin Lungleiah hman a ni a. Mizoram hi India rama Vaihlo (meizial, sahdah, tuibur etc) hmang nasa ber te, a dawttu te kan ni thin a. State pualin vaihlo dona ni vawi 10 kan lo hmang tawh a, vaihlo hmanna lamah tlahniam hret hret mah ila, vaihlo dona kawnga hma lak nasat ang huin a tlahniam chak lo hle.
Tun tuma vaihlo dona ni hmannaah, health minister chuan zuk leh hmuam thian thianghlim turin sawrkarin nasa zawkin tan a la dawn tih leh, kohhran, tlawmngai pawl leh zirlai naupangte nena tan kan lak tlan chuan kan ram hi kan thian thianghlim thei ang, tih a sawi a.
Global Youth Tobacco Survey-2 (2016-17)-in a tar lan dan chuan Mizoramah naupang kum 13-15 inkar zingah zuk leh hmuam ti 58% an awm a, Mizoram leh Arunachal Pradesh chu India rama sang ber a ni.
Heta tang ringawt pawh hian ‘Nasa zawka tanlak’ a ngaihzia a lang nghal a. Kum 13-15 inkar hi high school kal rual an nih avangin, high school leh higher school lamah beihpui thlak dan ngaihtuah a pawimawh dawn hle tih a lang a ni.
Vaihlo leh a kaihhnawihin hriselna a tihchhiat dan chu mithiam ten an sawi tam ta hle a, kan hre bel viau tawh awm e. Chuti chung chuan kan thlah hleithei lo chu a ni ber a, India ramah pawh India hmarchhak state-te hian vaihlo kan hmang nasa a, NE India rau rau-ah pawh state hnufual leh rethei Arunachal leh Mizoram chu vaihlo uar ber kan ni le tlat bawk. Mithiamten an sawi danin, zial zu ve loten meizial khu an hip luh secondhand smoke hi, meizial zute ang thova tawrh theih a ni a, hnar kaltlanga chuap chhunga zial khu hi direct-a hip luh a nih avangin a hlauhawm zual a ni. GATS-1 (2009 -2010)-in a tar lan danin Mizoramah in chhunga mei zuk khu secondhand smoke tuartu 96.5% an awm laiin, GATS-2 (2016-2017)-ah chuan 84.1%-ah a tla hniam a. A tlakhniam hnu pawh hian a la turu hle. Hengte hi kan hriselna a pan chhan te hi a nih rinawm.
Eng pawh ni se, sawrkar lamin ‘hma kan la ang’ an tih ang ngei hian hma an lakna tur hi bawhzui nghal rap rap thin se a duhawm hle a ni.