Vaivakawn Jt YMA Field chungah lei dawhkai tum

Vaivakawn traffic tawt tihziaawmna atana PWD ruahman dan sawihoin Inrinni khan PWD minister Vanlalhlana hoa thutkhawm a ni a. Department hotute leh Joint YMA Aizawl West hruaitute an tel.
PWD minister chuan lirthei pung zel avangin Vaivakawn traffic junction-ah traffic jam avangin lirthei khalhtuten hun tam tak an khawhral phah thin a. Traffic jam avanga he kawng pawimawh tak zawhtute harsatna sutkian a nih theihnan khawtlang hruaitute rawn chunga ruahmanna siam thuai a tul tih sawiin, khawtlang leh ram tih hmasawnna tura Aizawl West Joint YMA hruaitute inhawnna lawmawm a tih thu a sawi.
PWD hotute ruahman dan chuan, Vaivakawn traffic junction helna tur ruahmanna kalpui theih a nih chuan, Joint YMA Field sir zawhin, Vaivakawn bazar building leh Vaivakawn bus stand chhak, Dawrpui Vengthar panna kawng inkarah lei metre 75-a thui dawh kai a ni anga, lei zau lai ber hi metre 15.5 niin a zim lai ber hi metre 7.5 tur a ni a, ban 14 a awm dawn a ni.
Lei dawh tur hian Joint YMA Field huamchhunga ban (pillar) awm lo tur leh lei hi field hmangtute tan hnawk pha lo tura siam a tul thu sawi a ni a. Lei dawhkai hian traffic jam nasa avanga mipui harsatna sutkian a nih dawn bakah khawtlang tan hmasawnna hrang hrang a ken tel dawn avangin Aizawl West Joint YMA hruaitute chuan a thuphungin ruahmanna hi an thlawp tih an sawi a ni.