Valbuanga leh mi dang tel lo TNT team thar chu…

Thutak Nunpuitu Team-in an player rinrawl engemawzat an kawl zui theih loh avangin team thar an din a, hnam dang player lalut loin thla thar atanga khelh tur Pro Volleyball League an hmachhawn dawn.
Riak lutin an hmunpui Muanna Vengah TNT an inpuahchah a, kum dang aia chona sang zawk hmachhawn ngai dawn mah se an phur tlang tih team enkawltu zinga mi Vanlalmuanpuia chuan a sawi a, an huphurh lo.
Kum 2023 khan TNT-in an vanglai hmangin Mizo hlanga Pro Volleyball mipa champion hmasa ber an ni a, he team hian kum 2024-ah beisei pha zui lo mah se nikumah final lutin, Anastasia Electric Veng an hneh zo ta lo a ni.
Kum kalta khan an player langsar ber Vanlaltanchhana leh rinrawla an hman zinga mi Zodingliana’n Mizoram Police an zawm a, rawngrut lai an nih avangin chhawr theih an ni dawn lo.
Anni bakah hian team tichaktu leh blocker tha Zosangzuala’n Anastasia a zawm a; kum khat an kawl hnuah a chawr chhuahna Tuichangralah Saidingpuia Sailo a kir bawk.
Team captain Vanlalchhantluanga Sailo hoin team an din thar leh a, Pro Volleyball-a tawnhriat nei tawh Hunthar player hlui Rohluzuala leh Theiriat Lunglei spiker Lalhriatpuia lalutin, nikum lama an chhawr tam loh Lalsaitluanga leh Ramdintharate chu rinrawlah an hman a ngai a, Tlangsam atangin season liamtaa an hman theih loh Laldinchhunga kohkir an tum mek bawk a ni.
Muanpuia chuan an tana pawimawh ber chu player-te thlarau nun a nih thu leh chumi ber a fel tawh chuan huphurhawm a awm lo niin a sawi a; kum dang ang bawkin team tihchakna tur hnam dang player an ngaihven lo a, a lakna tur sum an nei loh avangin Mizo hlanga khel leh turin an inbuatsaih tih a tarlang tel.
Kum 2016-a Pro Volleyball an tan kum khan TNT hian Mizo hlangin final lut nghal mah se nikum ang bawkin Anastasia an hneh lo a, pahnihna ni chungin championship hmasa ber an lo thlah liam tawh a ni.
A tir atangin tlakhniam nei miah loin Mizoram volleyball inelna sang berah an la tel kim vek a, kum tinin boruak nei lian leh league tihlutu ber an ni.
Kumin hian hmel thar puin fiahna danglam an hmachhawn dawn a, May ni 11-a Pro Volleyball khelh tan hnuah TNT hmel thar nihphung dik tak kan chiang chho tan chauh dawn niin a lang!