Vana lawmpuitu CM leh sports minister

Vana lawmpuitu CM leh sports minister
Nimin, Pathianni zing khan Joshua Van Bawi Thawnga chuan Brazilian fighter Alexandre Pantoja kut atanga a chhuhsak UFC flyweight title kha Pantoja lak atang bawkin a humhim zui leh ngat a, khawvel puma Zo hnahthlakte’n kan lawmpui ti ila a sual lo mai thei a, chu’ng zingah chuan Mizoram chief minister Lalduhawm leh sports minister Lalnghinglova Hmar an langsar.
CM chuan social media pakhat facebook-ah sap tawngin lawmpuina a tarchhuak a, tah chuan UFC 331 UFC Flyweight Championship-a hlawhtling taka a kawnghren a humhim leh theih avangin Joshua Van Bawi Thawng chu thinlung takin a lawmpui tih a ziak.
A tarlan zel danin, Vana chu a inthununna leh a khelh dan pui lutuk avangin Mizo mipuite’n an chhuang takzet tih tarlang telin, inpekna tak tak nena an duhthusam tihpuitlin an tumna kawngah Mizo infiammi la naupang zawkte pawh a chawk phur nasa hle tih a sawi a, history bung thar ziah belh zel turin duhsakna a hlan nghal bawk.
Sports minister pawhin social media kaltlang bawkin heti hian lawmpuina a tarchhuak:
“Joshua Van Bawi Thawng ka lawmpui e. UFC Flyweight champion kawnghren humhim a, khawvela tha bera chhal thin Alexandre Pantoja a zawna a hneh thei hi a ropui a, a chhuanawm takzet a ni,” tiin.
Kum 24-a upa Myanmar chhuak Vana khan South American insual thiam lakah December 2025 khan hnehna chang tawhin, Pantoja title kawl lai a chhuhsak nghal a; mahse, kha mi tum khan round khatna an tan fel hlawt tihah, second 26 chauh a kal hman tihin a tumpui khan a kiu a tina a, a khelh chhunzawm theih tak loh avangin Thawnga chak danah mi tam takin rinhlelhna an nei a, Alexandre nen khan inbei nawn leh ngat se a chak zo kher ang em tih zawhna a piang.
Nimin zingah dam ver vawrin an innuai nawn a, hnial rual lohin Joshua Vana a chungnung zawk a tih khwvelin a hmu ta nge nge a; sawitu thenkhat phei chuan round nganaah khan minute tlemte pawh han belh leh zeuh se knock out hmangin emaw a chak theih mai an ring hial a; judge zawng zawng point pekah a chak fai vek ta reng a, khawvel pawhin he Zo hnahthlak tlangval huaisen leh thahrui nei zet hi rinhlelhna mitin a thlir ta lo!
MMA record-a tum 18 chaka vawi hnih chiah la tlawm Vana hian hnehna a chan hnuah, “Pantoja ka hneh hmasak kha mi tam takin tihpalh thil thu mai a nih thu an sawi thin a, a tha e, tunah min han ringhlel leh ula,” tiin khawvel a cho!
Vana hi kum 2000 bawr chhoa piang zinga UFC champion ni thei hmasaber niin, kumin May thla khan Japanese fighter tha ve taka sawi Tatsuro Taira lakah a kawnghren a lo humhim tawh a, tunah he division-a fighter tha ber a nihzia nemnghet turin kum 36 mi Pantoja lungawi thei lo, inpe thei lo, zawr thei lo ka a hupbet ta a ni!
Nimin round khatnaah tumpuite bawhbeh thiam, kherhbeh hnua tukzal ching Pantoja khan Vana a han bawh tlu mai a, mahse, Vana a talchhuak thei a; na fu fua kuttum vai chhuah bakah khupa tumpuite dawm chhoh fua fua lai hmuh tur a awm bawk.
Kum 12 mi lek a nih laia Myanmar atanga United States-a an pemluhpui Vana’n round hnihnaah a left-handed jab hmangin a tumpui a deng nual a; round thumnaah Brazilian hmaiah jab mai ni loin a hnek fuh siah siah!
Pantoja zawkin round lina rawn thunun ve lehin, Vana a kherh tlu leh a, mahse, Hakha tlangval hian inpek a tum awzawng lo a, Brazilian tan tihngaihna a awm bal lo!
Final round-ah Lai superstar Vana’n kum li chhung zet UFC flyweight champion lo ni tawh Pantoja a hnek nual a, tum khat phei chu tlu hnawk khawpin a hnek a; a tumpui kha a tuarchhel ve pah bawk a ni.
Hun a tawp a, judge-te scorecard tarchhuahah Chin tlangval a chungnung chiang hle!
‘VEN’a ni lo! VANA zawk!
Joshua Van tia hriat lar Van Bawi Thawng hi sap hoin ‘Van’ tih lai hi a nih dan turin an lam lo a, ‘Ven’ tiin an lam a, hei hi keini, Zo hnahthlakte chuan kan zawm ve mai tur a ni lo.
‘Vana’ tia lam mai tur a ni a, mi lar ni loin Mizoramah awm se Lai hming lar leh an hming mawi tak ni tura ngaih ‘Thawnga’ tiin kan ko zawk pawh a ni mai thei…