Vande Mataram leh a behbawm…

Ministry of Home Affairs-in India ram chhunga zirna in zawng zawngah India national song- Vande Mataram sak chhuah ngei tura thupek a chhuah chungchangah, MZP Gen. Hqrs chuan kumin March 9 khan an duh loh thu an lo auchhuahpui tawh a. Tun hnaiah thuchhuah siam lehin, tihluihna hmanga sak tir kan nih lohnan hma kan la dawn, an ti a; “Zirna in chu thiam zirna tur a nih angin politic thila hman kan phal ngai dawn lo,” an ti a ni.
Vande Mataram hi kum 1875 vela Bengali poet lar tak Bankim Chandra Chatterjee-a phuah a ni a, a lehkhabu Anandamath tih chhungah a awm a. British sawrkarin India an awp lai khan he hla hi zalenna sualtute fuihna hla ber a ni a, British sawrkar pawhin a khap hial a ni.
Kum 1950-ah India Constitution siamtuten he hla chang hmasa ber pahnih hi India National Song atan an pawm a. He hla chang hnih hian India ram hi Nu ber anga sawiin, a ram leilung mawina leh thatna atanga a chhunga cheng mipuiten malsawmna kan lo dawn avanga fakna a ni; sakhaw bik kaihhnawih a awm lo. Amaherawh chu, he hla pumpui chang rukah hian, a chang hmasa pahnih bak chang dangah hi chuan Hindu pathiannu hming pathum- Durga, Lakshmi leh Saraswati tih te a tel nuaih tawh a, hei vang hian Muslim leh sakhaw dang thenkhat chuan Pathian pakhat chauh biak an rinna nen a inmil lo an ti a, kum 1937-ah Congress pawhin hemi vang hian a hmasa pahnih chauh hi official-a hman turin an thliar hrang ta a ni.
Heti hian tehkhin ta ila: India ram hi Kristian tam berna ram ni ta se, national song-ah “Nu Thianghlim Mari, tih te, Isua hming te hi tel se, chu chu India ram sakhaw hrang hrang vuantute sak luihtir tum ta ila, tuna kan dodal ang hian an dodal ve ngeiin a rinawm.
Tun dinhmuna hriat theih chinah, Bihar leh Uttar Pradesh state te chuan zirna in zawng zawngah programme tan dawnin Vande Mataram sak turin thuchhuah an siam tawh a, West Bengal pawh hian an puang tawh maithei e.
Eng pawh ni se, India ram hian hnam hla “Jana gana mana” kan nei a, chu chu kan ngai paiwmawh vek a, he hla sak dan turah pawh state tinin dan kan zawm tha vek awm e. Hnam hla te, hnam flag te hi hnam inpumkhatna lantirtu a ni a, kan ngai pawimawh tlang vek. Mahse, tuna barh luih ang zawnga kalpui tum mek “Vande mataram” erawh hi chu, national anthem ang a ni chiah tawh lo; a zawm theiin zawm mai se, zawm thei lo an lo awm a nih pawhin khauh bur lo sela. Inbarh luih ang zawnga thil a kal chuan hnam inpumkhatna tiderthawngtu a ni zawk hlauh ang tih te pawh a hlauhawm alawm maw le!