Vawi lehkhata kalphung thlak thut hi mipui lamin kan zo lo – Lalthansanga

Vawi lehkhata kalphung thlak thut chu mipuiin kan zo lo tih an hria a, zawi zawiin mipui rilru leh hnathawktute kawng dik an zawhpui dawn tih minister Lalthansanga chuan a sawi.
Thawhtannia an party office-a inkhawmah ZPM hruaitu Lalthansanga chuan, kalphung thar mipui sawrkar an din mekah vawi lehkhata kalphung thlak thut chu mipuiin kan zo lo tih an hria a, chuvangin zawi zawiin mipui rilru leh hnathawktute kawng dik an zawhpui dawn a, dik leh rinawm taka thawktuten malsawmna an dawng dawn tih a sawi.
Mizoram kaihruai tawhtuten kalphung dika ram an kaihhruai theih reng laiin, dik tawk chiah loin a hrulah rei tak an lo kal tawh a, tun dinhmun hi kan thlen phah ta niin a sawi. “Tunah hian kalphung tharah kan lut ta chiah a, hun inthlak danglam (transition period) ah Mizoram kan awm mek. Dik lo taka contract hna leh thil dang thawktute chu keini chuan kan hrem ngam dawn a, ram mipui hi thil danglam kan hmuhtir dawn,” a ti.
Sawrkarna an chelh tirh, hna an thawh hma hauh atangin thudik hrulah miten beih dan tur an zawng nghal char char a, mahse hei hian a tihnual dawn loa, a tichak zawk niin Lalthansanga hian a sawi.
Fisheries minister chuan sangha khawi tuimite tan sangha chi an sem dawn a, a chi man atanga zaa 70 chu sawrkar tum tur a ni tih a sawi. “Vawiin thlenga sanghaa kan la intodelh lo hi kan vei a, kan sangha thar hmanga Mizoram chawm kan tum mek. Project lian kan thehthlak zinga pakhat phei chu central-in min pawmpui tawh a, hetiang lam tuipuite lo inkau ula, hma kan la thuai ang,” a ti.