Vawiinah Tripura Assembly inthlang dawn

February 16 hian thla khat chuang zet campaign neih a nih hnuah Tripura Assembly election chu neih a ni dawn a, nimin tlai lam khan campaign khar a ni.
Tripura district 8-a Assembly Constituency 60-ah venhimna khauh tak hnuaiah inthlanna neih a ni dawn a. Election Officials te chuan Central Armed Police Forces (CAPF), Tripura State Rifles (TSR) leh state police personnel te chuan venhimna an kalpui thu an sawi a.
Polling station venghim tur hian security 31,000 vel siam niin polling station 3,327 chu hmun hrang hrang 2504 ah dah a ni.
Tripura Chief Electoral Officer (CEO) Gitte Kirankumar Dinkarrao chuan 259 candidates awmin heng zinga 31 chu hmeichhia an nih thu a sawi a. Kum 2018 Assembly polls ah khan 297 candidates awmin hmeichhia 24-in an chuh a ni.
Prime Minister Narendra Modi chuan election rallies te southern, northern leh western Tripura ah te neiin Union Home Minister Amit Shah leh BJP president J.P. Nadda te chuan Tripura hmun hrang hrangah kal kualin rally an nei thung a. Union Ministers Rajnath Singh, Sarbananda Sonowal, Smriti Irani, Arjun Munda, Chief Ministers Himanta Biswa Sarma (Assam), Yogi Adityanath (UP), leh N. Biren Singh (Manipur), West Bengal’s Leader of Opposition Suvendu Adhikari, MLA Agnimitra Paul, actors Mithun Chakraborty leh Hema Malini leh BJP leaders leh MP thahnem tak te chu campaign-in an feh chhuak hlawm a ni.
CPI-M general secretary Sitaram Yechury, politburo member Prakash Karat, Brinda Karat, Tripura Chief Minister hlui Manik Sarkar leh Left leaders hrang hrang te chuan Left party leh Congress tang dun tan an campaign a. West Bengal Chief Minister leh Trinamool Congress supremo Mamata Banerjee, leh party national general secretary Abhishek Banerjee te pawh trinamool congress tana campaign a thawk chhuak zingah an tel a. Congress’ Lok Sabha leader Adhir Ranjan Chowdhury, union minister leh ex MP Deepa Dasmunshi, Congress leader Alka Lamba leh central leader dangte pawh an campaign bawk.
Congress leh CPI-M kaihhruai Left Front te chuan a tum khat nan seat insemin inthlan an hmachhawn a, Left Front te hian candidate 47 neiin Congress ten seart 13 an chuh ve thung.
Candidate 259 zingah BJP ten candidate ngah berin 55 la an thawh a, CPI-M ten dawtin 43, Tipra Motha Party ten 42, Trinamool Congress ten 28 leh Congress ten 13 an nei a ni.
BJP te chuan an thawhpui Indigenous Peopl’es Front of Tripura (IPTF) te hnenah seat nga an pe a, mahse, seat ruk an chuh thung a. Southern Tripura-a Ampinagar-ah BJP ten Patal Kanya Jamatiya an canddiate laiin IPTF te chuan sitting MLA Sindhu Chandra Jamatia an candidate thung a. Tripura inthlan turah hian independent candidate 58 awmin hei bakah hian party tenau zawk te thawhchhuah mi 14 lai an awm bawk.