Hmeichhe thi nei te chawlh pek SC-in ngaihtuah dawn

Supreme Court chuan February 15 khan hmeichhia zirlai leh hnathawk tena an hnathawhna hmuna thla tin thi an neih laia chawlh an lak theih nana state te dan siam tura phutna chu a ngaihtuah tur thu a sawi.
He ngenna hi Chief Justice D.Y. Chandrachud kaihhruai bench hmaah ngaihtuah ran tura chhawpchhuah niin CJI chuan February 24 ah ngaihtuah a ni ang, a ti.
He petition hi Delhi-a cheng Shailendra Mani Tripathi theh luh niin Centre leh States tin te chu section 214 of the Maternity Benefit Ac, 1961 zawm vek tura ngenna a ni a.
He Act Section 14 hian inspectors te ruatin sorkar chuan an thuneihna chinah he dan hi tihhlawhtlin a nih theih nan hma a la tur a ni a ti a.
Petition thehluttu advocate Vishal Tiwari chuan ram hrang hrang heng United Kingdom, China, Wales, Japan, Taiwan, Indonesia, South Korea, Spain leh Zambia te chuan kawng khat talin menstrual pain leave hi an kalpui tawh tiin a sawi a.
Hmeichhiate chauh chu mihring nihnaah nau pian theihna nei niin nu nihna kawngah stage hrang hrang paltlang an ni a, chumi kawngah chuan taksa leh rilru lamah harsatna hrang hrang tawkin thi neih mai bakah, rai, nauchhiat leh medical complication dang tawng bik an ni a ti a.
Petition chuan 1961 Act chuan hmeichhia tena harstana an thawh theih te tarlang leh hrethiamin hei vang hian hnathawka chhawrtu chuan hmeichhiate chu hlawh pe tho siin rai laia chawlh an pek ang leh nau an chhiat leh tubectomy operation an neih laia chawlh an pek angin thi an neih lai pawhin an pe tur a ni a ti bawk.
“Vanduaithlak takin section 14 of the Maternity Benefit Act, 1961 in provision a pek angin India chuan inspector post asiam a, mahse, inspector appointment a ngaihthah leh si a ni” tiin petition chuan a tarlang.
1961 Act chu Parliament-in nu nihna zahna leh hmeichhia hnathawk te laka zahna a lantirna kawnga hma a lakna ropui ber a ni a ti bawk a. Mahse, he dan provision te hi sorkar leh pawl hrang hrang ten a nihna tur angin an kalpui hauh lo, tiin tarlan a ni bawk.
Petition chuan India ram state zingah Bihar state chauh chu kum 1992 atanga hmeichhe hnathawk thi nei te ni hnih chhung special leave pe awm chhun a ni a ti bawk a. Indian company zingah Zomato, Byju’s leh Swiggy te chuan period leave an pe tiin a sawi bawk.