Vawk man tlawm lai

Tunlaiin Aizawlah vawk man a tlawm a, a talhtute’n an lei tlawm thin khawp mai. Mahse hetia a man a tlawm hi talh tura leitute tan a lawmawm chuang lo a, an lei tha ngam lo.
A talhtute’n an lei tha ngam lo a, mipuiin vawksa an lei tha ngam hek lo. A vulhtute an tuar a, a talhtute’n an tuar bawk. Hrilengin vawksa lei leh hralh a nghawng mek.
Mizorama vawk hri African Swine Fever (ASF) a leng mek a, Aizawl pawh a nghawng hle. ASF len hmasak kha chuan Aizawl khawpui chhungah a nasa lo thin a, tum dang aiin tunlai hian he hrileng hi Aizawlah a na a ni.
Bazar-a inzuar thin, vawk talhtute’n vawk man a tlawm thu hi an sawi a, inches 50 vel, Rs 45000 vela an lei thin kha tunlai hian Rs 30000 aia tovin an lei ngai lo tih an sawi. Chuti chung chuan an lei tha ngam lo tih an sawi bawk.
Vawk talhte hian tunlaiin vawk lian an lei tha ngam lo bawk a, inches 50 chin hi an talh chak lo. An sawi danin, inches 45, inches 46 vel an duh a, a chhan chu hetiang tiat hi a sa mawi a, mipuiin vawksa an thinhrik lai hian a hmel mawi deuh lo chu an talh chak lo.
Bazar-a vawk talhte’n Inrinni ni lo ni dangah phei chuan inhralh a har tih an sawi a, ‘theka’ an neih avangin an talh chu a ngai a, mipui lamin an lei lo tluk a ni tih an sawi. Inrinni-ah hi chuan tlemin mipuiin an lei ve leh deuh a, chuti chung chuang a hmaa an hralh zat ang chu an pha lo thin hle tih an sawi bawk.
Vawk talhte hian inhralh a har thu an sawi a, an hralh bang mahni in lamah an kawl thin thu an sawi. Vawk talhtu pakhat phei chuan “Deep freezer litre 400 dawng pahnihah kan hralh bang kan dah hnur mai!” a ti.
Vawk vulhtute an mangang a, vawk hralhna tur an hmu lo. A talhtute chuan tun hma nula to ang mai kha kan ni an ti fiamthu a, vawk neite’n leisak hram turin an ngen ngawih ngawih thin tih an sawi.