VC/LC term pawh tawi tum hi mipui zah lohna nasa tak a ni – Lalruatkima

VC/LC term pawh tawi tum hi
mipui zah lohna nasa tak a ni
– Lalruatkima
Village council/ local council term pawh tawi a nih tur thu Home minister-in a sawi mai chu a thlangtlingtu mipui zah lohna leh democracy palzutna a ni tih MNF treasurer Lalruatkima chuan a sawi.
Sinlung Hills Council inthlan neih tura campaign mek MNF treasurer chuan, Home minister Pu K Sangdanga’n local council leh village council term pawh tawi a nih tur thu a sawi chu a thlangtlingtu mipui zahlohna a ni, tiin, “Mipuiin kan aiawha duh taka kan thlantlin VC-te ZPM sawrkarin an thawhpui thei lo hi a pawi hle. VC/LC te hi development kaltlangna tur agency dik an ni. Chu chu ZPM sawrkar hian an palzut ta vek a ni,” a ti.
ZPM chuan an party ni lo LC leh VC thawhpui an tum lo ringawt nia sawiin, a thlangtlingtu mipui an zah lo hle a, mipui sawrkar an din lo chiang hle tih a sawi. Kalphung thar chu kalphung azawnga nawi ber leh ramhlui zia kalpui nasa ber, party mi vulh nasa ber an ni tih a sawi bawk.
“ZPM hian LC leh VC inthlan hi sawhthing thar hmaa inthlan an duh niin a lang a, sawhthingah hian an mualpho an ring niin a lang. ZPM hi anmahni reng mai an thawkho tha loa, midang phei chu thawhho pui harsa an ti hle a ni,” Lalruatkima hian a ti.
Sawrkar sum renchem loin an ham bawrh bawrha invulhin, chutih laiin mipuiah chhiah an ti sang awk awk niin ZPM sawrkar a puh a. Kan ti loang, an tih an ti char char a, kan ti ang an tih an ti lo char char nia sawiin, ZPM kalphung thar chu a mak hle tih a sawi.
Kan ram kan hnam leh sakhua a him a. Khawvel puma Zohnathlakte buaipui a, humhima huaisen taka humhalh leh turin MNF a sawrkar leh a ngai tih MNF hruaitu hian a sawi a ni.