VC term pawhtawi mai theih thu minister sawi AMVCA-in a helh
Minister Lalrinpuii’n VC-te term pawhtawi a nih mai theih thu a sawi chu VC intelkhawmna pawl chuan a helh thu a sawi.
All Mizoram VC Association (AMVCA) thuchhuak chuan, tunhnaia Southern Hqrs ZPM Lunglei inkhawma Health minister thusawi, media lama an lo hmuh danin “VC-ten sawrkar an thawhpui that duh loh vanga VC term pawh pawhtawi a nih mai theih thu a lang tih sawiin, hei hian a barakhaih takzet tih a sawi.
VC-te hi India ram democracy lungphum pawimawh pathum – central, state leh local goverment zinga pakhat, democracy grassroot an tih hial, tualchhung sawrkar, ‘The Lushai Hills District (Village Council) Act 1953’ hmanga rorel tura mipuiin kum 5 atana an thlanchhuah an ni a. He danin thuneihna a pek leh central leh state sawrkarin programme & policy hrang hranga agency atana a hmanna kawnga tha taka thawh chu an duty, VC atana thlan an nih chhan a ni tih a sawi.
‘Kan duty tihhlawhtlinna kawngah mahni pawh thawk hman lek loa khawtlang leh ram tana kan buai ve em em lai a, hetiang thu kan hre ta mai hi mak kan tiin min thawng takzet a. Health minister-in sawrkar thawhpui duh lo VC a tihte hi khawi VC nge ni a, eng kawngin nge an lo thawhpui duh loh, tih min hrilh turin kan ngen a. AMVCA anga lo inzilh a, tha taka sawrkar thawhpui tura infuihthar kan inpeih reng a ni tih min hriatsak se kan duh,’ a ti.
VC term chu Panchayati Raj system, central sawrkarin a siam zulzuiin kum 5 term tura tih a ni a. State sawrkar-in a duh chuan pawttawiin pawtsei thei ngei mah se, chhan tha tak neia tih tur ni ah an ngai tih sawiin, ‘VC din tirh ata Covid-19 vanga thla 5 chhung MNF ministry-in a pawhsei bak kha VC term kal lai tih danglam hi sawrkar kal tawh ten an la tih ngai loh niin kan hria a. Chhan bulbal sawi tur tak hre siloa, VC-ten min thawhpui tha duhlo, tih chhuanlam mai maia mipuiin duh taka an thlan ve tho VC-te term pawhtawi sak tum niawm taka ngaih theih thu lo lang hi tha lo kan ti hle a, village council zahawmna tihbawrhban leh democracy pawngsualnaah kan ngai a ni,’ AMVCA chuan a ti.
Sawrkarin thawhpui a duh phawt chuan an inhawng em em zawk a ni tih an sawi bawk.