VC thiahte court-ah kal tum

Tunhnaia sawrkarin village council a thiah thenkhat chuan court lama zualko an tum nia sawi a ni.
The Aizawl Post-in a biaknaah Hnahlan Village Council lam chuan court-a kal hi an tum a. An ukil-te hnenah an document duh ang an hlan a, an chungah an innghat tawp tih an sawi.
Champhai district-ah hian Hnahlan bakah sawrkar thar pian hnua VC thiah dang pawh an awm a; a then hi chuan court-a kal an sawirik ve tho laiin, inthlan hmachhawn that a, mipui court hmanga chinfel tum pawh an awm niin thudawnna chuan a sawi. VC thiah mai bakah hian VC thiah leh tum, lo hre lawk te pawh an awm a, an ni zingah pawh court lama kal tuma inkau sa an awm nia sawi a ni bawk.
Member 7 awmna Hnahlan Village Council bik hi 2024 July 26 khan Local Administration Department secretary chuan hriattirna pe in, dan tlawhchhan hnuaiah thiah a nih thu hi hrilh an ni.
‘Khawtlang an enkawl danah complaint a awm avangin verification lak a ni a, report atanga a lan danin – Khawtlang mipui zah lo takin, Hnahlan ram chhungah Defence Road-in a paltlangna hmunah mipui hriat lohin ram an lo invalh vak vak mai a; Land Committee lem siamchawpin, signature lem pawh an siam,’ tih chu sawrkarin hriattirna a tihchhuahah tarlan a ni.
Hnahlan VC insawifiahnaa leh District Local Administration officer report enkawpin, VC dinglai hian khawtlang rorelna kawngah dikna an palzut hle tih hriat a ni tih a sawi bawk.
Hriat theih chinah, Hnahlan bakah hian Champhai district-a Ngur leh Khuangthing pawh VC thiah a ni.