Venezuela-ah Maduro-a vengtu hotu ber sipai lal bân

US-in Caracas luhchilha Venezuelan hruaitu, Nicolás Maduro-a mana New York-a ruihhlo kaihhnawih thubuaia a chungthu rel tura an hruai hnuah Venezuela-a presidential honour guard general in command Javier Marcano Tábata chu bân a ni.
Presidential honour guard hi sipai, an rama hruaitu lu ber vengtute an ni.
Venezuelan sorkar chuan US-in Maduro-a man tura beihpui an thlaknaa thi leh hliam zat an puang lo va, guard thahnem tak erawh an thi ngei nia hriat a ni.
Gen Marcano Tábata-a bâna a aiawhtu tur ruatna hi president lailawk, Delcy Rodríguez-i’n Nilaini chawhnu (India-a zan) khan a tichhuak a ni.
Rodríguez-i hi Thawhtanni khan an ram rorelna in, sorkar tantu tam zawkna, National Assembly-ah rinawmna thu tiamtira lak luh a ni a. Maduro-a vice-president tang lai niin lung tang mek an hruaitu tana rinawm tak nia hriat a ni.
Maduro-a an man hnu lawk khan US President Donald Trump-a chuan thuthar lakhawmtute hnenah Venezuela chu ‘an enkawl dawn’ thu leh Rodríguez-i pawh a hrilh tawh thu a sawi.
Rodríguez-i hian US thil phut a ti duh lo a nih chuan ‘Maduro-a tawrh aia na’ a tuar dawn niin a vau nghal a, heng zingah hian tuialhthei chungchang pawh a tel a. Venezuela hi khawvela a ngah ber ram a ni.
Thawhlehni khan US president hian Venezuela atang hian US-ah tuialhthei bareel maktaduai 50 ‘chawk luh’ a nih tur thu a sawi leh a, Venezuela-a sorkar lailawk erawh chuan hemi chungchang hi engmah a la sawi ve lo.
Rodríguez-i hian president a nih hnuah US thil phut leh duh hi engmah sawi a la nei lo va. Maduro-a man a ni erawh ‘dan lova ruk bo’ tia sawiin a sorkar chuan ‘US sorkar chu thawhhopuiah an sawm’ tih a sawi bawk.
An ram chhung leh pawn lamah khawi lam nge a hawi dawn tih ngaihchan mek a ni a, a sorkarah hian amah phatsan duh thawm a awm mek bawk nia sawi a ni.
Gen Marcano Tábata-a bân a ni hi anmahni chhunga hotu lian insiksawina hmasa ber a nia. Presidential guard a kaihhruai bakah hian Venezuela-a military counterintelligence unit DGCIM kaihruaitu pawh a ni.
UN chuan DGCIM hi Maduro-a sorkarin a mi duh loh zawngte a rah behnaa tal na ber zinga miin an sawi.
Venezuela-a sipaite chuan US-in a kahnaah an mi 23 an thi a, general panga an tel niin an sawi.
Gen Marcano Tábata-a thlaktu tur ruat hi president ni mek tan US-in a beih leh thut pawha a himna kawnga pawimawh a ni dawn a. Trump-a hian a thawh hnihna atana bei tur pawhin a sipaite an inbuatsaih niin a sawi tawh a; mahse, an chet leh mai erawh rin a ni lo thung.