Veng fai berah Republic Vengthlang an thlang

On Dec 22, 2023 12 0

Aizawl Municipal huamchhunga veng fai berah Republic Vengthlang thlan a ni a. College Veng, Chawnpui leh Bethlehem Vengthlang chu bawlhhlawh thliar hrang tha vengah thlan an ni bawk.
Kumin October 1-8 chhung khan Aizawl Municipal Corporation (AMC) chuan Faina Hapta 2023 a hmang a, Ningani khan khar niin, lawmman sem nghal a ni.
Faina Hapta denchhena AMC hmalakna zingah, local council 85 atanga veng fai thlan chhuah, bawlhhlawh thliarhrang tha veng thlanchhuah, faina leh thianghlimna kawnga hma la tha mimal chawimawi, vantlang inthiarna tihchangtlun leh hman khat daih plastic khap chungchanga hmalakna a tel.
Faina Hapta 2023 chhunga endiknaah Aizawl veng fai berah Republic Vengthlang thlan a ni a, pahnihna Laipuitlang niin, pathumna Thakthing Veng a ni. Lawmman dawngtute hian chawimawina thuziak bakah pakhatnain Rs. 50000, pahnihna Rs. 30000 leh pathumna Rs. 20000 hlan a ni. Veng 5 hnenah consolation prize Rs. 5000 theuh hlan a ni.
Bawlhhlawh thliarhrang tha local council pathum – College Veng, Chawnpui leh Bethlehem Vengthlang hnenah Rs. 5000 theuh pek a ni bawk.
Kumin Faina Hapta pual hian faina leh thianghlimna kawnga hma la tha mimal 23 hnenah chawimawina thuziak leh sumfai Rs. 2000 pek a ni a. Sr. Sanitation Office hnuaia khawlai hmun phiat (street sweepers) hnathawk tha thlanchhuah – Malsawmkimi leh B Lalrinkunga hnenah chawimawina thuziak leh sumfai Rs. 10000 ve ve hlan a ni.
Faina Hapta kharna hmanpuitu Aizawl mayor Lalrinenga Sailo chuan faina beihpui chu khar a ni lo a, faina hapta bik erawh khar a ni, tiin, “Hmun fai chu hmun nuam a ni mai a, Vairam atanga mikhual lokalten Aizawl fai an tih zia min hrilh thin,” a ti. Thingtlang lamin faina lama hma an sawn nasat avangin Aizawl pawhin faina kawnga tan la lehzual tur leh hmun dang tihdan tha entawn a, hma sawn zel turin local council-te a chah tih a sawi.
In hmun laih phal lohna hmuna bawlhhlawh leh leivung paih chungchangah local council-ten thuneihna tam zawk an neih theihnan hma lak zel a ni tih a sawi a. Veng thenkhat street light neilo ten AMC-a report pe zel tur leh, AMC leh local council ten thawhhona tha an neih theih nan rawtna thlen zel turin a chah a ni.