Vijay-a’n governor hmu mah se sorkar thar a la siam thei lo

On May 8, 2026 3 0

Vijay-a’n governor hmu mah se sorkar thar a la siam thei lo
Tamil Nadu Governor RV Arlekar-a chuan a vawi khat inthlan chuhnaa tling, Tamilaga Vettri Kazhagam (TVK) hruaitu, Vijay-a chuan sorkar thar siam turin thlawpna a ngah tawk lo tih a sawi.
Arlekar-a hian Ningani tuk khan Vijay-a hi Lok Bhavan-a a chennaah a ko va, rorelna ina thlawptu 118 tal neih a ngaih MLA 113 chauh a la neih avangin eng party dangin nge TVK chu thlawp thei ang tih te pawh a zawt.
Vijay-a hian a hmain Left (MLA pali) leh regional Tamil party (paruk) thlawpna nen sorkar siam thei khawp an tlin a beisei thu a lo sawi tawh a ni.
Lemchang thiam, politician ni ta hian governor hnenah buk hmachhawn turin a inpeih thu a hrilh nia sawi a ni bawk.
An pahnih hian Nilaini khan an inhmu tawh a, Arlekar-a hian Vijay-a’n sorkar siam tura a sawi chu a hnawlsak a, Lok Bhavan thuchhuah chuan a hnuah governor hian thlawptu a ngah loh vangin a hnawl niin an tar lang.
Vijay-a kaihhruai TVK hian MLA 108 an nei a, sorkar siam nana mamawh zat chu 10-in an pha lo va. An mamawh zahve hi Congress-in an pe dawn a, a chanve dang chu Communist Party of India (CPI) leh Communist Party of India (Marxist) MLA pali a nih a rinawm a. A bak chu Tamil party tenau zawk, Viduthalai Chiruthaigal Katchi (pahnih) leh Pattali Makkal Katchi (pali) te pawh a nih a rinawm.
Heti a nih chuan TVK, Congress, Left, VCK leh PMK hi hi MLA 123 an nei tihna a ni dawn a, Vijay-a tlinna pakhat, Trichy (East) a kalsan hunah pawh seat 122 a ni dawn a ni.
Hetih lai hian VCK hi Vijay-a politic elpui, Dravida Munnetra Kazhagam (DMK) nena inzawm an ni a, PMK pawh BJP nena inzul an ni bawk.
An pahnih hian Vijay-a an zawm dawn chuan an thawhpui an thlak a ngai dawn a. Thil dang awm leh thei chu All India Anna Dravida Munnetra Kazhagam (AIADMK) nena thawhho a ni bawk.
Vijay-a hian party lian pahnih, kum 60 chuang Tamil politic-a lo inel pawt, DMK leh AIADMK lam hi chu a hawi vak lo nia sawi a ni a. AIADMK hian BJP an thawhpui avangin a duh vak lo nia sawi a ni bawk a, chanchin ziah lai thleng hian thil chiang a la awm thei lo.
TVK hian thawhhona nghet a siam thei lo a nih chuan governor-in assembly thlan thar chu a suspend thei a, sorkar laipuiah President’s Rule-a dah turin a rawt thei a, inthlan nawn leh a a thlen thei.
Vijay-a kaihhruai MLA thlan thar 107-te chu Chennai atanga km 50 vela hla, temple awmna, Mamallapuram-a resort-ah an inkhung hran mek.