Vinicius Junior deusawh nghawng kal zel

Vinicius Junior deusawh nghawng kal zel
Pathianni zan Mestalla Stadium-a Real Madrid leh Valencia inkhelh tumin Real Brazilian mihang forward Vinicius Junior chu chi inthliarna hawi zawngin mualneitu Valencia su-pporter-te’n hun pumin an aunawmnah a ni ber a, zawngte hrama hram khum a tawk a, khelmual chhunga inbak-kaihna avangin tunlaia racism tuartu langsar ber hi red card hmanga hnawhchhuah a ni nghe nghe.
Valencia khelmuala thil thleng khan khelmual pawn lamah chanchin neih belh zelin, Spanish Football Federation (RFEF) chuan mualneitu team lakah an supporter-te an thunun zawh loh avangin hremna an lek nghal a, euro 45,000 (£39,000) chawi tura an tih bakah an stadium chhung chhim lam thutna thlur thenkhat an kharsak tur thu an puang bawk.
Spanish police-te chuan Mestalla Stadium-a Brazilian laka chi inthliarna lam hawi tichhuaka puh mi pasarih an man tawh a, kha thil kaihhnawih video lo kawl thate chu an hnena rawlruk turin ngenna an tichhuak tawh nghe nghe.
Police-in Thawhlehnia mi pasarih an mante zinga pali hi Madrid khuaa an reh niin, a dang pathumte hi Valencia khawpuia an mante an ni thung.
Tarlan thuak tawh angin, sikhat faia Real Madrid tlawm tum minute 97-a hnawhchhuah Vinicius laka red card pek kha Spanish Football Federation (RFEF) chuan hnukkirin, RFEF thuchhuah chuan referee tan khati ang boruakah thil thlen dan dik tak chhuichhuah a har niin an sawi.
Stadium chhung thutna thenkhat kharsak chungchangah RFEF chi inthliarna lam hawia Vinicius deusawhtute bawrkhawm tamna lai chu hriat theih a nih an tarlang.
Kum 22 mi Vinicius Junior hi tun season-ah a vunrawng avanga deusawh hlawh ngun tak niin, a laka chetna duhawm lo tak avang hian khawvel pumah thlawptu a nei tha hle a, Thawhlehni inkhel pakhat second half-a thlak a nih laiin Barcelona winger Raphinha chuan a kawr hak hmangin a chipui Vinicius Jr. a thlawpzia khawvel hmuhah a phochhuak.
Thawhlehnia Real Valladolid leh Barcelona inkhel bakah Celta Vigo leh Girona match-ah pawh tunlai Spanish top flight-a vun rawng avanga chi inthliarna thawm richhuak thin demna lantirin, he match pahnihah hian player leh match official-te’n dinghoin ‘Racism, out of football’ tih inziahna banner an lekchhuak.
Khawvel puma demna thu a rik nuai nuai karah Brazil sawrkar pawhin thuchhuah siamin demna an auchhuahpui a, an khawpui lian Rio de Janeiro tihmingthangtu pakhat Isua lim lianpui an siam ‘Christ the Redeemer’ an tih pawh zan lama an kahen pup thin kha Thawhtanni zanah darkar khat chhung teh meuh an tithim!
Isua lim enkawltu Christ the Redeemer Archdiocesan Sanctuary an tihte chuan Brazilian FA leh Observatory of Racial Discrimination in Football an tihte nen tangrualin Spain rama chi inthlairan lang chhuak duhlohna hi eng tithim chungin an lantir a, hei hi racism do tura an inturualna tilangtu leh a tuartu Brazilian player bakah khawvel puma racism tuartete an thlawpzia lantirna a nih thu Instagram kaltlangin an tarlang.
Vinicius Junior thlawpa thu leh hla tichhuak langsar zingah Fifa president Gianni Infantino telin, mihang superstar rual Kylian Mbappe, Rio Ferdinand leh Formula One driver Lewis Hamilton hmuh tur an awm.
Valencia leh La Liga sponsor(tu) Puma pawh an ngawi ral thei ta bik lo a, Vinicius Jr. lamah an tang tih thuchhuah an siam ngat a; tun season tawp thlenga La Liga title sponsor ni tur Spanish bank Santander pawhin Brazilian an thlawp tih an tarlang ve tawh bawk.
Football great Pele fanu Kelly Cristina Nascimento pawhin Vinicius chunga thil thleng chu a duh loh thu thinrim engphiara sawichhuak chungin Brazilian thlawp tura Spain leh La Liga chechhuak mai lo a dem bawrh bawrh!
“Spain hi zak mawlh rawh se. La Liga pawh zak bawk rawh se. An player thlawp zawnga an din loh avangin Real Madrid pawh zak ngawih ngawih rawh se,” tiin Reuters hnenah Thawhlehni khan a inhrithla biah biah!
Vinicius tithinrim zualtu pakhat chu Pathian ni la laa La Liga president Javier Tebas-a thusawi kha niin, Valencia supporter-te dem ta mai loin Tebas chuan racism dona kawnga sawiho tura an sawmna Real Madrid player-in a chhang lo a, inawkmhonaah a lang duh lo a tih chu a ni.
Tebas-a tawng chhuah duhdan khan midangte pawh a tithinrim a, Manchester City leh England mihang defender hlui Micah Richards chuan BBC Radio 5 Live’s Monday Night Club-ah La Liga president thusawi khan a thisen luang lai a tilum zak tih a sawi!