Vladimir Putin leh Joe Biden te inkhak zui zel

Vladimir Putin chuan Khawthlang ramte a beihna chu President Joe Biden-an Kyiv a tlawh hnu lawkah nasa zawka kalpuiin, hetih lai hian Western democracy te chuan, Russian inlulinna lakah nghet taka din an tlum tlat thung.
Tun kar hi boruak rip takin a chiah niin Zirtawpni hi Russia-in Ukraine a run kum khatna tur chiah niin Putin chuan hun rei tak hnua khawvel hriata thupuanna a nei zui a.
Khawthlang ramte chuan Nazi Germany a tichak tia sawiin Ukraine chu neo-Nazi regime ‘anti-Russia’ ah a chhuah mek tiin a sawi bawk a.
Putin thusawi hnu lawk darkar khat velah Biden chuan thu sawi ve lehin autocrats te chuan thumal pakhat chauh an hrethiam, chu chu ”No, no, no!’ tih a ni tiin a chhang let ve thung.
“Putin hian khawvel chu a duh angin a inzial tup tup turah a ngai a, a hresual duai a ni,” tia sawiin Biden chuan Nato chu tunhma zawng aiin an inlungrual zawk a ti bawk a. Kyiv nghet takin, pau takin, sang tak leh zalen takin a ding reng a, Khawthlang ramte chuan Ukraine chu an tihlawhchham ngai dawn lo, tiin a sawi zui bawk.
Warsaw-a royal castle-a amah lawmna neihah Polish President Andrzej Duda chuan Biden-an Kyiv a tlawh chuan free world-in engmah hlauh a nei lohzia pholanin a awm tiin a sawi a. Nato chuan khawvel zalen a awm theih nan bei zel dawnin Ukraine chu ‘indonaah a chak ngei ang’ tiin a sawi bawk.
Putin-an thusawina neihah Ukraine-a Russia sipaite hmasawnna a sawi lang mang lo va, chutiang bawkin indona tawp dan tur awm ang engmah sawilanna a nei lo bawk. Russia military lama chanchinthar liantham awm chhun chu Wagner mercenary group leader Yevgeny Prigoshin an Russia chief of staff leh defence minister te chu Wagner group tihchhiat tum leh ralthuam nei thei lova siam tuma a puhna zawk chu a ni.
Russia president chuan kum 2010-a US nena inremna an siam New Start nuclear arms control treaty atanga an inhnuhdawh thu a sawi thung a. He inremna hi nucclear warheads bituk tawp siam tura inremna niin Putin chu Nato leh UK leader te chuan ngaihtuah nawn turin an ti zui nghal a ni.
Hei bakah hian Putin chuan a thusawiah combat duty ground-based system thar din a nih thu sawiin nikum khan Putin hian Ukraine-a Russia-in ram a lak leh a territory te humhim nan ‘eng pawh hman a ni ang’ tiin a lo sawi tawh bawk.
Putin-an rei ngial Kremlin-a thusawina a neihah khawthlang ram te chu demin, “Anmahni zawk a ni indona bultantu chu ni…loh theih lohin tharum hmanga tihtawp kan tum a ni,” tiin Putin chuan Russia house of parliament pahnih thukhawm te hmaah a sawi.
Ukraine-ah khawthlang ram sipai pakhatmah an awm lo chungin Russia foreign ministry chuan US ambassador Lynne Tracy kovin Washignton chuan Ukraine atangin ‘US-Nato military leh ralthuamte an lalet tur a ni’ tiin a sawi.
Putin hian Khawthlang leh Nato te chu tun hma pawhin demin a bei fo reng tawh a, kum khat kalta vela Ukraine a run hma ni chiahin chu tho chu a sawi a. Russians te chu Iraq indona leh Belgrade bomb hmanga beihna te hrilh hre nawnin mahse Russia-in Syrian civil war a inrawlhna thuk tak a neih leh a thenawm Georgia leh Crimea a ram chhuhsaka chet lakna a neih te erawh a sawi duh hauh lo thung.
Putin chuan Ukraine indona chu Europe-a Indopui II-na hnua mihring tawrhna nasa ber tiin a sawi bawk a. Chutih lai mekin nikum November thlaa Russian sipaite Ukraine-in a chhuhsak Kherson khawpui chu Russia chuan missile hmanga beiin mi parukin nunna an chan phah a, mi thahnem takin hliam an tuar a.
Ukraine President Volodymyr Zelensky chuan, Russia hian sipai hmun emaw tum a nei lo, a tum ber chu mipuite thlabara siam a ni tiin a sawi zui a. Ukrainian forces te chuan eastern Ukraine-ah awmhmun an benbel zel thu a sawi bawk.
US President Biden chuan Kyiv a tlawh hnuah Warsaw-ah Polish president nena inhmuhna nei zui nghalin, Biden chuan Moldova pro-EU president Maia Sandu, Russia ina sorkar paihthlak a tum pawh Biden chuan an thlawp tlat thu a sawi lang bawk a.
Presdient Putin chuan kum 2012 daih tawh khan Moldova sovereignty ah zawhna neiin Moldova-a region pakhat Russian sipaite inbunna Ttansnistria chu Moldova ram ni lo angin a lo sawi tawh a ni.
Nimin khan President Biden chuan Nato eastern ram pakua leader te nena inhmuhna nei bawkin America chuan a thlawp tlat tur thu a hrilh bawk a.
Nato hian Article 5 hnuaiah an member ten beih an tawk a nih chuan chhan tur tiin inremna an siam vek a. Biden chuan US-in Nato leh Article 5 a thlawpna chu tihnghin rual loh tiin a sawi bawk a. “Nato member tin ten an hria a, Russia pahwin a hria a, pakhat beih chu vai beih ang a ni,” tiin Biden chuan a sawi.
Biden an Kyiv a tlawh hnuah hian Italy Prime Minister Giorgio Meloni chuan Ukraine a tlawh zui ve nghal a, Russian sipai tena civilian za chuang an tihhlumna Bucha leh Irpin khua te a tlawh a. Ukraineian te chuan Italy chu an rin ngam tur thu sawiin, “Indo tirh phat atangin in lam tang kan ni a, a tawp thlengin in lam tang kan ni ang,” tiin a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More