Bihar CM Nitish Kumar-a’n English \awng hmangtu a khak

Amit Kumar, Lakhisarai district-a loneitu chu English-a a tawng vangin Bihar Chief Minister Nitish Kumar a tithinur ang tih a ring pha lo. Patna-a Bapu Sabhagar-a State chhung hmun tin atanga loneitute pungkhawma 4th agriculture road map leh consultation programme hmannaah English-a a tawng avangin Nitish Kumar a thinrim tlat.
Loneitu hlawhtling thlanchhuah te chu sorkar chuan an hming lama kochhuakin dawhsana dinga khualzahawm te hmaa an tawnhriat sawi tura tih an ni a. Sorkar hotu pungkhawm zingah hian Chief Minister Nitish Kumar mai bakah Deputy Chief Minister Tejashwi Prasad Yadav leh Agriculture Minister Kumar Sarvjeet te pawh an tel a ni.
Amit chu dawhsana ding chhuak loneitu koh zinga pali-na niin a dinchhuah hnuah, “Good afternoon” tia bul tanin, “Chief Minister Nitish Kumar leh a visionary politics ah lawmthu ka sawi duh a. Amah avangin, thui tak ka thleng thei a ni,” tiin a sawi.
English leh Hindi chawh pawlhin mushroom farming a kalpui dan leh a hlawkna te, farming tha zawka kalpui dan tura thurawn te a sawi zui zel a. A thusawi kar lakah English thumal food production, consumption, incentivisation leh possible solution tih English thumal te a sawi lang a. Hei bakah hian Bihar a Agriculture Technology Management Agency (ATMA) atanga training a neih avanga hlawkna a chan te pawh a sawi a ni.
Amit hian minute li chauh thusawina a nei hman tihin Nitish Kumar chu inrawlh zuiin, “Eng nge ni ta? Hei hi Bihar a ni tih i hre lo em ni? I thusawi a piangah English thumal i hmang reng a. Eng nge i rilruah awm? Kan State leh ram tawng Hindi tawng engtiangin nge i theihnghilh theih? Mak min tih tir a ni. Loneitu i ni a, loneih chu mipangngai te tih thin a ni. Rawtna te leh thurawn pe tura sawm i ni a, English-in i tawng daih a. Hei hi England a ni em ni? Hei hi Bihar a ni a, Bihar-ah i awm mek,” tiin a lo sawi a.
Nitish Kumar chuan sawi chhunzawmin, “Eng nge thleng ta? Covid atang khan mipui ten mobile phone an hmang nasa hle tih ka hria a, tawng hlui te an theihnghilh ta a ni ang. In tawngah fimkhur ula, hei hi kan lawm vak lo. Eng pawh sawi ula a tha vek a, mahse, in State tawngin tawng rawh u,” tiin a sawi zui bawk.
Amit chuan Nitish Kumar hnenah ngaidam a dil zui a. Chumi hnuah Hindi in thu a sawi zui a, a thusawi chhunzawmah English thumal a hmang zui lo lutuk niin a tawp khar nan ‘provide’ tih thumal erawh a la hmang zui hram a, chu pawh school naupang te hnena mid-day meal atana pa (mushroom) pek chungchangah a ni a. “School-a mid-day meal semah naupangte hnenah pa pek ni se” tiin Amit chuan a sawi a ni.
Nitish Kumar chu a insum zo chuang lo, “Eng nge a sawi, provide kiya jaye, not uplabdh kiya jaye. Nangni ho hian engineering zir zo ka ni a, English hlira zir zo ka ni tih in hria em? Chu erawh zir leh zirtir nih chuan thil hran daih a ni. Heta English hman hi a tulna eng nge, i chipui leh state chhungah eng nge English hman a ngaihna? Tun hnaiah Jeevika Didi pawhin English thumal a hmang tih ka hria a. English hi khawvela tawng awmchhun a ni em ni? He tawng hian India-ah ro a rel a ni,” tiin a sawi zui bawk.
Mushroom farming a luhchilh hmain Amit hian MBA degree a la a, Covid lenlai thleng khan Pune-ah kum 10 hnathawka awm tawh niin pandemic laiin a seilenna khuaah letin work-from-home advisory angin a thawk a. Chuta tang chuan Pune ah let leh tawh lovin Bihar ah mushroom farming a buaipui zui ta a ni.
Amit thusawi zawh hnua dawhsana chuangkai thusawitu dang tu mahin programme tawp thlengin English thumal sawi leh an awm tawh lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More