Vohbik leh kum upa hnenah an mamawh chi hmanrua pe

Vohbik leh kum upa hnenah
an mamawh chi hmanrua pe
Artificial Limbs Manufacturing Corporation of India (ALIMCO) leh Lunglei district administration tangdun huaihawtin Project LEAP hnuaiah Ningani khan Social Empowerment Camp buatsaih a ni a. Lunglei district-a vohbik (person’s with disability – PwD) leh kum 60 chunglam tanpuina hmanraw mamawh hnenah a thlawnin hmanraw chi hrang hrang sem a ni a. Lunglei High Powered Committee vice chairman V. Malsawmtluanga’n a hmanpui.
Lunglei bawrhsap Navneet Mann sawi danin, Project LEAP hi nikum December-a hmalakna thlirho atanga ruahmanna lo piang chawpin a hrin chhuah a ni tih a sawi a. A kaihhnawih sawrkar department dang nen vohbik leh upate tan hma a lak sa reng chu thawhhona atanga awmze nei leh darhzau zawka kalpui a nih theihnan ruahman a ni tih a sawi.
Project LEAP hnuaiah vohbik inchhiarna (PwD survey) buatsaih a nih bakah hriselna endik, UDID card leh tanpuina hmanraw dawng thei tura dil theihna atan health assessment camp buatsaih a ni tih a sawi a. Project LEAP hma lakna kaltlanga sawrkar atanga hamthatna dawng thei tura UDID card la nei lo engemawzat UDID card siamsak an ni leh vohbik leh upa 741-in ALIMCO atanga tanpuina hmanrua an dawng thei tur chu Project LEAP hlawhtlinna a ni tih a sawi.
Social Empowerment Camp-ah hian Ministry of Social Justice & Empowerment hnuaia hamthatna – Assistance for Disabled Persons Scheme kaltlangin vohbik 54 hnenah leh Rashtriya Vayoshri Yojana kaltlangin upa kum 60 chunglam 687, an vaiin mi 741 hnenah ri hriatna leh chetvelna atana an hmanraw mamawh hrang hrang – tricycle, wheelchair, bengdar, mitdel tiang, zakdawh tiang leh hmanraw dang 3448 a thlawnin sem a ni.