Vohbikte enkawlnaah ICFAI thawhpui
Vohbikte enkawlnaah ICFAI thawhpui
Ephatha Society of Mizoram for the Deaf & Hard of Hearing (ESOMDHH) chuan bengngawng tawngtheilo leh bengri hriatna lama harsatna tawkte enkawl kawnga thawkdun turin ICFAI University Mizoram chu memorandum of understanding (MoU) a ziahpui a. Kum thum chhung atana hman tur niin, a tul anga ennawna pawhsei zel theih a ni ang.
He thawhdunna in a tum ber chu, ESOMDHH-in bengngawng tawngtheilo leh bengri hriatna lama harsatna tawkte a enkawl kawngah, social service leh a kaihhnawih thila tanpuina a mamawh hunah ICFAI University Mizoram hian NSS volunteers leh an zirlai dangte kaltlangin a pui thin dawn a. ICFAI University-a thawktute leh zirlai naupangten rualbanlo, a bikin bengngawng tawngtheilo leh bengri hriatna lama harsatna tawkte chungchanga research tih a duh leh mamawh hunah ESOMDHH hian bengngawng tawng theilo an enkawlna school – Ephatha Special School for the Deaf and Hard of Hearing kaltlangin an resource mamawh pein an lo tanpui thin dawn a ni.
MoU an ziahnaah ICFAI University Mizoram vice chancellor Prof. Ginlianlal Buhril chuan, hetianga Mizorama bengngawng tawngtheilo leh bengri hriatna lama harsatna neite enkawltu pawl nen an thawk dun thei tur chu lawmawm a tih thu a sawi a. Hetiang thil hi Mizorama higher institution hoin an la dai tam loh thil nia a hriat thu sawiin, mumal leh awmze nei zawka rualbanlote tanpui kawnga ICFAI University-in hma a la thei tur chu lawmawm a tih thu a sawi.
ESOMDHH president Saihmingthangi chuan, an thawh dunnaah hian ICFAI University Mizoram tan hmasawnna tam tak a thlen tir ngei a beisei tih a sawi a ni.
He hun hmanpuitu commissioner for Persons with Disabilities Vanlaldiki Sailo pawhin ICFAI University leh ESOMDHH-in bengngawng tawngtheilo leh bengri hriatna lama harsatnna tawkte chhawmdawlna atana MoU an ziak chu lawmawm a tih thu a sawi a. ICFAI University Mizoram-ah rualbanlote enkawl dan zirna (Disabilities Study Center) hawn theih nise a duh thu sawiin, hemi atan hian theih ang anga hma la turin ICFAI University hotute chu a ngen nghal a ni.