Vote chhiar tura inpuahchahna thlir ho

Lunglei district election officer, bawrhsap Ramdinliani kaihhruaiin Lok Sabha inthlanpui neih zawh tak vote tla chhiar tura inpuahchah dan thlirhoin Nilaini khan nodal officer ho leh police hotute an thukhawm.
DEO chuan Lunglei district-in boruak muanawm tak hnuaia felfai taka MP inthlanpui vote chhiar an neih theih nan inthlanpuia nodal officer ruatte chu 2023 MLA inthlanpuia nodal officer-te deuh vek tho ruat an nih angin, MLA inthlanpuia tha taka an mawhphurna an hlen tawh angin Lok Sabha inthlanpui vote chhiarah pawh theihtawp chhuah theuh turin a chah.
Election officer TT Beikhaizi chuan Lok Sabha inthlanpui neih zawh tak vote chhiar tur inpuahchahna kalpui dan leh ruahmanna siam te sawiin, Lunglei district hnuaia Assembly segment 6-a vote tlate chhiar nan Saikuti Hall ground floor-ah counting room 6 siam a ni a, vote hi round 4-a chhiar zawh tura ruahman niin, inpuahchahna hrang hrang – counting official ruat, training buatsaih dan tur, randomization hunte a sawi a ni.
Superintendent of police J Lalmuankima chuan boruak muanawm tak hnuaia Lok Sabha inthlanpui vote tla felfai leh thianghlim taka chhiar a nih theih nan police-te inpuahchah dan, hmalak tawhna leh hmachhawp a sawi a. Dan leh thupek kenkawh bakah traffic chetvelnaa hmalak dan tur a sawi bawk.