Vote thlak leh a behbawm…

UT kan nih atanga Mizoramin inthlanpui kan hmachhawn vawi 13-na, State nih hnua inthlanpui vawi 9-na ni bawk, Mizoram Legislative Assembly General Election 2023 chu nimin November ni 7 khan zawhfel a lo ni leh ta a. Hmun thenkhatah EVM tha lo avanga vote thlak han khaihlak phah deuh a awm tih loh chu buaina leh harsatna dang awm lovin inthlan hi zawhfel a ni a, ‘tluang takin inthlanna neih a ni’ a tih theih awm e.
Hetih lai hian, inthlan apianga kan tihdan phung, kan zia pakhat kan la bansan theih loh chu, vote thlak hun bituk, zing dar 7 leh tlai dar 4 inkara vote kan thlak fel hman lo thin hi a ni awm e. Hei hi voter tam vanga vote thlak chhung a rei thin vang ni lovin, vote thlaknaa intlar kan peih loh vanga midang tlem hun nghaka in lama kan tawmim deuh thup thin vang ni berin a ngaih theih. Tlai khawhnuah vote thlak turin kan chhuak khawm a, a tawp lamah kan inhnawh tawt leh a, hun bitiam pelh a ngai leh thin a ni ber mai.
Vote tla zat hi he thu buatsaih lai hi chuan 76.53% tih a ni a; hetah hian home voting leh ballot a la tel hman lo. State Election Commission lam chuan inthlanpui hmasa 2018 voter turnout (81.64%) kha khum theih an beisei thu erawh an sawi thung.
Kum 80 chin chunglam leh pian phunga harsatna neite tana home voting kalpui a ni a. Heti chung hian nimin khan kal tha thei lo, inpuak lawp lawp ngai te, zakdawh tiang hawl chunga inchhawm ngai te, kum 80 chunglam, a thente chu kum 100 chuangte pawh, harsa ti taka vote thlakna hmun pan tawk tawk an awm nawk mai a. Hei hi mipui hnena thu puanzar that tawk loh vang nge, a hmuna vote thlak duh hrim hrim vang zawk nge, a chhan hriatchian fak ni lo mah se, hei hi bihchian atan a tha khawpin a rinawm.
EVM tha lo a awm fo pawh hi tun aia felfai zawka tih dan zawn a pawimawh hle. Nimina chief minister vote thlak tur, EVM tha lo avanga a han khaihlak te kha a zia lo hle a, national TV lamah a lang chuaih chuaih a, a mualphothlak zawnga ngaih theihte pawh a ni awm e. Hmun dangah pawh EVM tha lo sawi tur a awm neuh neuh bawk.
State dang thenkhata polling booth capture emaw, thildang neuh neuh a awm thin avanga buaina thleng thin ang kha, Mizoram hian kan tawk ve lo a, hei vang hian inthlanna muanawm leh hlawhtling kan nei tiin a sawi theih awm e. Vote chhiar hma thlakhat chhung vel chu tlin dawn leh dawn loh inchhut buai reng rengin hun kan hmang dawn a ni a. Party leh candidate tin ten theihtawp an chhuah theuh a, eng result pawh lo chhuak se, rilru puitling taka hmachhawn thei tura inbuatsaih theuh a pawimawh awm e.