Vote thlak that ni

Aizawl South-III assembly biala awm 20/13 Muallungthu Polling Station-ah vawiin – November 10 zing dar 7.00 atanga tlai dar 4.00 inkar hian vote thlak that leh a ni dawn a. Inthlan buaipuitute inpeih fel tawhin Ningani chawhnu dar 3.40 khan duty tur polling party-te chuan polling station an awmchilh tawh a ni.
Tarlan tawh angin Muallungthu Polling Station-ah hian inthlan hmaa EVM an enchhinnaa, an hmeh chhin chu paihfai (clear) loin November 7 khan vote thlak tak takna nen hman tlang a ni a, he P/S a vote nei zat aia tam vote a tla tih hi vote tlak dan enfiah lehnaah hmuhchhuah a ni. Election Commission hriattir nghal a ni a, an ni ruahmanna in November 10-a repoll nei turin inbuatsaih zui a ni
Vote thlak that turah hian General Administration Department secretary chuan danin thuneihna a pek angin, Muallungthu P/S a vote nei tan sawrkar chawlh a pe a ni.
Aizawl district election officer Nazuk Kumar chuan, danin thuneihna a pek angin Muallungthu P/S huamchhung mipui zawm turin, khawi hmunah mah mi panga (5) aia tam punkhawm emaw inhawrkhawm emaw a khap a; phalna pek bik tih loh aurinna (loudspeaker) hman khap a ni. Thupek zawm lo te chu IPC Section 188 hmangin an chungah na taka hremna lek a ni dawn tih a sawi. Silent period hman mek a nih avangin Aizawl South-III constituency chhunga vote nei si lo te chu constituency chhuahsan turin a hriattir a. Hei hian candidate leh election agent te leh party office bearer, state in-charge a ruatte erawh a huam lo a ni.