Vote thlak tir tumin theih-tawp kan chhuah – DGP

State pawna duty police-te vote thlak tir tumin theihtawp an chhuah a, tih ngaihna a awm ta lo tih Mizoram DGP Anil Shukla chuan a sawi.
DGP hian Lok Sabha inthlana state danga duty-a Mizoram armed police tirhchhuah an nih dan a sawifiah a. Kumin March 16 ah Election Commission of India-in inthlan hriattirna a tichhuak a, Ministry of Home Affairs-in state hrang hrangte instruction pe in, inthlana duty tur armed police force ruahman tura tihna a tichhuak ve leh a; Mizoramah March 20-ah nomination thehluh tan theih chauh a ni a, March 30-ah pawh candidate inhnukdawk turte hriat theih a la ni loh laiin duty turte hi ruahman fel an ni tawh tih a sawi.
March 28, 29 leh 30-a Bihar, Uttar Pradesh leh Madhya Pradesh-a duty turte kaltir tura tihna a chhuak a, special train-in a hun pangngaiah hian an chhuak ta tih a sawi a ni.
Chief electoral officer Mizoram chu police-te tan hian postal ballot-a vote an thlak theihna ruahman turin ziakin an ngen a; postal ballot chu candidate inhnuhdawh theih hun tawp hnu ah chauh tih theih a ni tih hrilh an ni. CEO hian an ngenna hi ECI-ah a thlen sak a, postal ballot hi falicitation centre ah chauh thlak theih a ni tih hriattir an ni leh ta zel tih Anil Shukla hian sawiin, “Vote an thlak thei lo hi pawi kan ti a, vote an thlak theihna’n hian theihtawp kan chhuah a, CEO pawhin theihtawp min chhuahpui,” a ti.
Zawhna chhangin DGP chuan, Mizoram Police ang tho hian Assam police company 27 vel tirhchhuah zingah an inthlan hun (phase) a vote thlak thei lo an awm a; Tripura-ah company 5 vel leh Manipur ah company 10 vel inthlana duty vang hian vote thlak thei lo an awm nia thu an dawn thu a sawi.
Home secretary H Lalengmawia chuan Representation of the People’s Act 1951 hmangin ECI-in kumin March 20 atang khan Mizoram sawrkar kut atangin state police-te an thuhnuaia awm turin deputation-in a rawn la daih tawh a. State sawrkarin an chungah thuneihna a nei loa, transfer tur ang chi ah pawh ECI hnena dil phawt ngai a ni, tiin, state sawrkar ngaihsak loh vanga police duty-te vote thlak lo anga sawi awm chu a dik lo tih a sawi a ni.