Vote tlak thatna Lunglei district ZPM-in LC/VC seat a la tam ber

February 12-a Mizoram district 9-a village council leh local council inthlanah Lunglei district chu VC inthlan bika vote tla zaa 80 kai pha awmchhun a ni a. Municipal inthlanah pawh Aizawl aiin Lunglei a tla tha zawk. Hetihlai hian LC/ VC seat chu ZPM-in a la tam ber a, sawrkarna siam theihna pawh a ngah ber dawn a ni.
LC/VC inthlanah hian result kimchang hriat ni tawh mah se, felfai taka remkhawm turin sawrkarna siam turte la intihfel theih lohna engemawzat a awm avangin, VC siam tur hriatchian theih loh a la awm nual a. Hetihlai hian VC bikah party mala seat la tam ber erawh state-a sawrkar lai ZPM niin, seat 1153 a la a, hnaih bertu MNF-in seat 744 la in, Congress-in seat 406 a la a, BJP in seat 17, HPC-in seat 4 leh independent-a dinga tling 87 an awm bawk.
VC bikah Lunglei district chu vote tlak thatna ber niin, za zelah 80.39 a tla a, Mamit district chu a dawttu niin zaah 77.27 a tla a; zaa 76.44 tlakna Serchhip district chu pathum a ni. Champhai district chu vote tlak chhiatna ber niin za zelah 71.92 a tla a, Saitual district (72.39%) leh Kolasib district (73.42%) chu vote tla chhiatna zual a ni.
Local council lamah AMC-ah ZPM-in 303, MNF 155, Congress 104 leh independent 8 a ni a. LMC-ah ZPM 60, MNF 42 leh Congress 43 an ni. Vote tlak dan hi AMC ah za zelah 63.87 niin, LMC hi zaah 70.17 a ni.
District 9-a VC inthlanah hian vote tla zawng zawng hi za zelah 75.37 niin, Municipal pahniha vote tla belhkhawm hi za zelah 64.79 a ni thung.
Inthlan zawh hlim atanga hriat theih chinah ZPM-in AMC ah LC 46-ah sawrkarna a siam a, LMC ah LC 8-ah sawrkarna siamin, a vaiin LC 54 a ni.
AMC-a LC 86-a inthlan neih leh LMC-ah LC 24-a inthlanah MNF-in AMC-ah LC 20-ah sawrkar siamin, LMC-ah LC 7-ah, a vaiin LC 27-ah sawrkarna a siam a. Congress-in AMC-ah LC 8 leh LMC-ah LC 6-ah, a vaiin LC 14-ah sawrkarna a siam a ni.
AMC-ah hian independent-in LC sawrkar a siamna 2 a awm a. Sawrkarna siam nghal thei awm lohna AMC ah LC 10 leh LMC ah LC 3, a vaiin LC 13 a awm a ni.
Tarlan tawh angin, Lunglei district-a Lanutui khuaah VC candidate thi a awm avangin State Election Commission ruahmanna in nimin – February 13 khan vote an thlak ve chauh a; LC candidate thi a awm avangin Aizawl Municipal hnuaia Lawipui Vengah vawiin – February 14 hian vote an thlak ve leh dawn bawk a, hemi hnu hian vote tla zat leh party tin seat lak zat kimchang hi a chiang thei chauh dawn a ni.